Pimmusay ni Jose Asia Bragado, dati a Literary Editor ti Bannawag, idi Oktubre 13, kalpasan ti pannakaitarayna iti ospital, kas impakaammo ti pamiliana. Agtawen iti 89.
Maibilang a kas maysa kadagiti panuli ti Literatura Ilokana, naipasngay ni Bragado iti Tabucolan, maysa nga away iti igid ti baybay iti ili ti Santa, Ilocos Sur, idi Agosto 25, 1936, tawen a pannakairugi ti ag-10-a-tawen a gobierno Mankomunidad (Commonwealth) a nangisagana iti Filipinas iti pannakaipaay ti panagwaywayasna idi 1946.
Nagpaay ni Bragado iti 32 a tawen iti Bannawag, a nagretiruanna idi 1997 a kas Literary Editor. Kas mannurat, adu dagiti naipaay kenkuana a pammadayaw a pakairamanan ti panangabakna iti Carlos Palanca Memorial Literary Awards iti sarita a para ubbing (Filipino category) ken literary grants manipud iti Philippine Writers Foundation ken Cultural Center of the Philippines.
Maibilang a maysa kadagiti mannurat iti Ilokano a kaaduan ti nasuratna a nobela iti Bannawag. Mairaman kadagiti naglatak a nobelana ti “Isla Furikawa” (1974-1975) ken “Congressman Pitong 1” (1987-1988), “Congressman Pitong 2” (1989-1990), ken ti kaudian, “Apo Baboy Party-list” (a maipabpablaak manen iti website ti Bannawag).
Nabotosan, baro nga opisial ti Ilocos Sur Provincial Capitol Press Corps
Indauluanna met ti gunglo dagiti mannurat iti Metro Manila idi 1988 ngem impasublatna ti puestona idi mabotosan iti sumaruno a tawen (1989) a kas presidente ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, sakbay ti panagpaayna nga NCCA Coordinator for Northern Luzon. Idi 1999, napili manen a presidente ti GUMIL Filipinas ken nabotosan iti maikadua a gundaway iti isu met laeng a puesto kalpasan ti dua a tawen—pammadayaw nga isu pay laeng ti nakagun-od manipud nabangon ti gunglo idi Oktubre 1968.
Nagpaay pay a presidente ti Child Jesus College iti Caloocan City a binangonda nga agassawa idi 1990 ken nangisuruanna iti Literatura iti kolehio a nangipangrunaanna iti Ilokano Literature ta kas kunana, “Masapul a mayam-ammo met kadagiti estudiante no asino dagiti mannurat nga Ilokano ken dagiti sinursuratda.”
Naparaburan dagiti agassawa a Bragado iti siam nga annak, 18 nga appoko, ken 13 nga appoko iti tumeng.
Naitulod ti bangkayna iti Forest Park iti North Caloocan City idi Oktubre 18, iti abay ti tanem ti kaingungotna, ni padana a mannurat Crispina Balderas-Bragado, tubo ti Bauang, La Union, a pimmusay idi 2013.
