Kararag ti kangrunaan a mekanismo dagiti Filipino a mangsaranget iti stress, segun iti kaudian a surbey nga insayangkat ti Social Weather Stations (SWS).
Naiwayat ti surbey iti entero a pagilian manipud Septiembre 24 agingga iti 30, a sinaludsodda kadagiti agtawen iti 18 agpangato, a maysa laeng ti isungbatda iti saludsod: "Ania ti aramidem tapno malabanam ti stress?"
Inruar ti SWS ti resulta itay Oktubre 23, a nangipakita a 16 a porsiento ti nagkuna nga agkararagda wenno makiramanda kadagiti naespirituan nga aktibidad.
Simmaruno ti 14 a porsiento a nagkuna a maturog wenno aginanada, ken 11 a porsiento ti nagkuna nga agpasiar weno agbiaheda.
Mapukpukaw a nobia, nasarakan iti Pangasinan
Pito a porsiento ti nagkuna a madaeranda ti stress gapu iti kaadda ti positibo a panunot, innem a porsiento ti mangipamaysa iti trabaho wenno pagadalan, innem a porsiento ti nagkuna a lipatenda wenno saanda unay a pampanuonoten dagiti parikutda.
Lima a porsiento ti nagkuna a mangipaayda iti oras iti pamiliada, ken lima a porsiento ti nagkuna nga agwatwat wenno agpagnapagnada tapno mailiwliwagda ti stress.
Uppat a porsiento laeng ti nagkuna nga agay-ayamda iti isports wenno online game, agtrabaho iti balay, makisarita kadagiti gagayyem wenno kakabagian, agbuya iti telebision wenno pelikula, mangan, agkanta wenno dumngeg iti samiweng tapno madaeranda ti stress.
Dua a porsiento ti nagkuna nga agbuyada iti social media, ken dua a porsiento ti nagkuna nga uminumda iti arak; maysa a porsiento aleng ti nagkuna nga agmula, agtalon, ken agsigarilioda tapno masarangetda ti stress.
Adda met nagkuna nga agsangitda laengen (.04 porsiento); ken adda nagkuna a makiumanda iti doktor (.02 a porsiento) no mariknada ti stress. (Ma. Cristina Arayata/PNA//Lito Hilidon/Bannawag)
