Imbatad ti Department of Justice (DOJ) a ti kondision iti agngayangay a kas state witness (testigo ti estado) iti kaso dagiti naanomalia a flood control project ket masapul nga isublida dagiti tinakawda a kuarta ti gobierno.
Daytoy ti kinuna ni Undersecretary ti DOJ Jesse Hermogenes T. Andres idi Oktubre 23.
Ni Andres ti daulo ti Law Enforcement Cluster ti DOJ ken undersecretary-in-charge ti National Prosecution Service.
Segun ken ni Andres, awan serserbi ti panangidarum kadagiti karaman iti anomalia no saan a maisubli ti natakaw a kuarta iti gobierno.
Kasapulan ti natibker ken nainkalintegan a pagtaktakderan iti parikut iti WPS --NMC
Iti budget hearing nga inangay ti Senado, kinuestionar ni Senador Rodante Marcoleta ti panangipetteng ti DOJ a masapul ti restitution, wenno pannakaisubli iti natakaw, kadagiti agngayangay nga agbalin a testigo ti estado.
Segun ken ni Marcoleta, awan ti probision mainaig iti restitution a nailanad iti Republic Act (RA) No. 6981, wenno ti Witness Protection, Security and Benefit Act, para iti agngayangay nga state witnesses.
Ngem insungbat ni Andres a paset ti hustisia ti pannakaisubli iti natakaw a kuarta ti gobierno, ket dinakamatna ti Section 5(d) ti RA No. 6981, nga agkunkuna a dagiti agngayangay nga state witnesses ket masapul nga agtungpal kadagiti legal nga obligasionna segun iti linteg.
Inlawlawag ni Andres a maysa a legal nga obligasion ti asino man a nagtakaw iti pondo ti gobierno nga isublina iti gobierno dagiti tinakawna. (Jeffrey Damicog/Manila Bulletin//Lito Hilidon/Bannawag)
