Impakaammo ti Department of Education (DepEd) idi Mierkoles, Oktubre 22, ti mid-school year wellness break para kadagiti mannursuro ken agad-adal manipud Oktubre 27 agingga 30, a maiganetget kadagiti pagadalan a mangipalubos iti teachers recovery time ken mangbalbaliw iti schedule ti In-Service Training (INSET) kalpasan ti break.
Kinuna ni sekretario ti DepEd Sonny Angara a panangannurot daytoy iti direktiba ni Presidente Ferdinand Marcos Jr. a mangipangruna iti pagsayaatan dagiti mannursuro ken agad-adal, nangruna dagiti naapektaran dagiti kallabes a natural disasters ken panagraira ti trangkaso.
“Iti linawas a panagbisitatayo kadagiti pagadalan, nangngegantayo ti kiddaw dagiti mannnursuro,” kinuna ni Angara iti maysa nga statement. "Maiparbeng nga ikkantayo ida iti oras tapno makainanada ken maaddaan iti nayon nga oras a makadennada dagiti pamiliada."
Naituding a maituloy dagiti klase inton Nobiembre 3, kalpasan ti pannakaobserbar ti undas. (Merlina Hernando-Malipot/MANILA BULLETIN)
