Gapu iti mapan a 47 a Filipino a matmatay iti inaldaw gapu kadagiti rason nga adda pakainaiganna iti arak, nangangay ti maysa a grupo dagiti agtutubo iti simboliko a Halloween protest iti Quezon City itoy nga aldaw, Okt. 28, a nangkiddawanda kadagiti agpampanday-linteg nga ingatoda koma ti buis ti arak tapno maleplepan ti kunada nga epidemia ti nalaka ken makapatay a mainum.
Inawaganda ti protesta iti “So Cheap, So Deadly: Reduce Alcohol’s Reach,” imparangda dagiti adu a lapida a nangibagi kadagiti biag a napukaw gapu iti alkohol, a mangipakita iti kinalukay dagiti pagannurotan ti pagilian maipanggep iti pannakabuis ti arak a kunada nga agtultuloy a mangitultulod iti adu a Filipino iti tanemda iti inaldaw.
“Nakakakilabot na araw-araw, may namamatay na 47 na mga Pinoy dahil sa alcohol . Ang ating mga ate, kuya, at kahit mga bunsong kapatid ang nagiging casualty sa sobrang cheap at accessible ng alcohol,” kinuna ni Gwyneth Barra, maysa a lider-agtutubo manipud iti UP Economics Towards Consciousness ken ti Sin Tax Coalition, iti maysa a pakaammo.
Kinadua dagiti doktor ken dagiti health advocate dagiti agtutubo iti kiddaw dagitoy a maingato koma ti buis dagiti arak, idinto nga imballaagda a ti di maikanatad a panaginum iti arak ket agbalbalin a “naulimek a pangta” iti salun-at ti publiko, nangruna dagiti agtutubo.
Mapukpukaw a nobia, nasarakan iti Pangasinan
Kinuna ni Dr. Allandale Nacino ti Philippine Addiction Specialists Society (PASS), a mapan a 17,000 a biag ti mapukpukaw iti tinawen iti pagilian gapu kadagiti rason nga adda pakainaiganna iti arak. (Jel Santos/ Manila Bulletin)
