Arigna nakaam-amak ti kaaduna nga aganay a ₱22 a bilion agingga iti ₱28 a bilion a cash a naikarga kadagiti maleta (luggage) ti agparparang a naitulod ken ni dati nga Ako Bicol party-list Rep. Zaldy Co, ti imbatad ti interim report nga inruar ti Independent Commission for Infrastructure (ICI).
Ti gatad--a mapapati a nakunniber wenno natakaw manipud kadagiti naanomalia ken "ghost" a flood control project--ket naggapu kadagiti impormasion nga inted dagiti dati a Department of Public Works and Highways (DPWH) Bulacan 1st District engineer a da Henry Alcantara ken Brice Hernandez, a nangamin iti pannakairamanda iti dakkel nga eskandalo ti panagkunniber bayat ti panagparangda kadagiti hearing ti ICI.
Iti interim report a nanggupgop ti damo a panagimbestigarna, impalgak ti ICI iti publiko iti umuna a gundaway ti mapapati a kaadu ti kuarta a naala ni Co kas pasuksok kadagiti flood control project.
Segun iti ICI, sumagmamano a panagitulod iti kuarta ti naaramid iti penthouse ken pagtaengan ni Co iti Pasig manipud 2022 agingga 2025.
Mapukpukaw a nobia, nasarakan iti Pangasinan
Tunggal panagitulod, di nakurang ngem pito a lugan, a naglaon ti di nakurang a lima agingga iti innem a "dadakkel a maleta." Aglaon iti ₱50 a million ti tunggal maleta, segun iti ICI.
Nailanad iti interim report a ti umuna a mapapati a pannakaitulod ken ni Co ket naaramid idi 2022 iti Shangri-La The Fort. Uppat agingga iti lima a panagitulod ti naaramid ditoy, nga agdagup ti iti di kumurang a ₱7 a billion agingga iti ₱8.75 a billion.
Kabayatanna, idi 2023, naminsan ti panagitulod iti The Fort, idinto a namindua agingga iti mamitlo ti panagitulod iti pagtaengan ni Co iti Valle Verde 6 iti Pasig City. Agdagup dagitoy iti ₱5.25 a billion ken ₱7 a billion.
Idi 2024, lima agingga iti innem a panagitulod ti naaramid iti pagtaengan ni Co iti Pasig City, nga agdagup iti ₱8.75 a billion agingga iti ₱10.5 a billion.
Kinuna ti ICI a nakaitulod ni Hernandez ken ni Co ita a tawen iti ₱1.75 a billion.
No gupgopen amin, nakaawat ni Co iti ₱22.75 agingga iti ₱28 a billion.
Segun pay iti ICI, kagitoy a panawen ti panagitultulodda iti kuarta a natakuatan ni Hernandez a ti pagtaengan ni Co iti Pasig "ket eksklusibo a maus-usar a kas pagidulinan kadagiti maitulod a kuarta" gapu ta awan ti muebles iti uneg ken"dagiti laeng maleta nga aggapu iti nadumaduma a mangitultulod" ti makita iti uneg. (Joseph Pedrajas/MANILA BULLETIN)
