Agtalinaed ti Bangsamoro Transition Authority (BTA) a lehitimo a mangiturturay iti Bangsamoro Autonomous Region in Muslim Mindanao (BARMM) kalpasan ti pannakaitantan ti umuna a Bangsamoro parliamentary elections.
Segun iti Office of the President (OP), gapu ta awan ti naangay nga eleksion, agtultuloy ti BTA a mangipakat iti sibubukel a turay ken autoridad kabayatan ti nailayon a transition period, agingga a mabotosan wenno madutokan dagiti baro nga opisial.
Kuna ti OP nga agtalinaed kadakuada ti karbengan a mangbaliw kadagiti pakabuklan ti BTA kabayatan ti transition period, segun iti paglintegan, ket innayonda a saan a kasapulan ti mangdutok manen iti baro, ta agtultuloy ti panagakem dagiti agdama a kameng agingga nga adda mabotosan nga opisial.
Kuna ti OP a ti agtultuloy nga autoridad ti BTA ket maitunos iti Bangsamoro Organic Law, Republic Act 12123, ken iti pangngeddeng ti Korte Suprema (SC) a mangitantan iti umuna a parliamentary elections a naaramid koma idi Oktubre 13, 2025, ngem nayalud-od iti di naladladaw ngem iti Marso 31, 2026.
Mapukpukaw a nobia, nasarakan iti Pangasinan
Idi Septiembre 30, 2025, indeklarar ti SC nga "unconstitutional" ti nabaliwan a linteg iti pannakadasdasig nga impaulog ti BTA a nairanta a mangigiya iti eleksion.
Binilin ti SC ti BTA a mangbukelda iti baro a linteg a mangikeddeng iti legislative district ti BARMM agingga inton Oktubre 30. (Ruth Abbey Gita-Carlos/PNA//Lito Hilidon/Bannawag)
