Saan a pinatgan ti Commission on Audit (COA) ti petision ti Department of Public Works and Highways-Davao City District Engineering Office (DPWH-DCDEO) ket pinasingkedanda ti impaulogda a notice of disallowance (ND) iti nangina unay ngem substandard ti materialesna a road rehabilitation project idi 2010 nga agbalor iti ₱12.7 a milion.
Kinontrata ti DPWH-DCDEO ti E. Gardiola Construction (EGC) para iti proyekto a "Rehabilitation/Improvement along Junction C.P. Garcia - Junction Magtuod Road, with Exception, Davao City" para iti ₱12,708,408.92.
Manamnama a malpas ti proyekto iti las-ud ti 90 nga aldaw ngem nalpas ti proyekto iti las-ud ti 28 nga aldaw. Gapuna, ₱18,074,731.73 ti naibayad iti EGC idi Abril 30, 2010.
Ngem idi ininspeksion ti Audit Team ti COA ti proyekto, natakuatanda a nangatngato iti 193.39 a porsiento ti balor ti kontrata ngem iti estimated cost nga ₱6,571,464.75. Maibilang a nangina unay ti kontrata iti ₱12,708,408.92.
Farm specialist iti Abra, napaltogan
Natakuatan pay ti COA a ti saan a nasurot ti naaprobaran a plano ken pagalagadan nga inkeddeng ti DPWH, ta saanda nga inlanad dagiti rukod ken landmark, ken adda depekto ken substandard dagiti guardrails, road signs, pavement studs, ken foundation blocks.
Inkalintegan ti DCDEO a saan nga inraman ti audit team dagiti nagasto iti semento, darat, ken graba, agraman dagiti nagasto iti transportasion ken tangdan dagiti nagtrabaho.
Ngem segun iti COA, awan ti merito daytoy a panangikalintegan ti DCDEO isu a pinasingkedanda ti naipaulog nga ND, ket impaganetgetda a nangina unay ti presio dagiti guardrail ken agsursurok dagiti road signs, kas paneknekan ti actual canvass sheet ken price quotation.
Nupay pinatalgedan ti COA ti ND, saanda nga inraman a mangsungbat ti sumagmamano a tao kas kada Engineer Gregorio Yee, Joselito Jamito, Cecilia Barrientos, Perry Neil B. Palacio, ken Ma. Gloria G. Sorrera (daulo ti bids and awards committee); ni Nelson B. Luayon (BAC Secretariat) ken ni Restituto D. Mira.
Binilin ti COA ti Prosecution and Litigation Office, Legal Services Sector a yumanda daytoy a kaso iti Office of the Ombudsman tapno maimbestigaran ken maipalia ti umno a kaso, no maiparbeng, kadagiti nagbasol iti transaksion. (Czarina Nicole Ong Ki/Manila Bulletin//Lito Hilidon/Bannawag)
