Inrekomendar ti Independent Commission for Infrastructure (ICI) ti pannakaipila ti kaso a kontra kada Sen. Joel Villanueva, Sen. Jinggoy Estrada; dati nga Ako Bicol Party-list Rep. Zaldy Co; ken dati a Caloocan 2nd district Rep.Mitch Cajayon-Uy gapu iti mapapati a pannakairamanda kadagiti naanomalia ken "ghost" a flood control project.
Inrekomendar pay ti ICI a maidarum ni Commission on Audit (COA) Commissioner Mario Lipana ken dati a Department of Public Works and Highways (DPWH) undersecretary Roberto Bernardo.
Binigbig ni ICI Chairperson retired Supreme Court (SC) associate justice Andres Reyes Jr., iti waragawagna idi Mierkoles, Oktubre 29, dagiti nadakamat a tattao nga addaan mapapati a pannakairaman iti anomalia, iti maika-44 nga aldaw ti panagim-imbestigar ken panangbukel iti kaso ti ICI iti dakkel nga iskandalo a nangriribuk iti pagililan/
Maibatay kadagiti testimonia ken affidavit dagiti resource person nga inawis ti ICI, kinuna ni Reyes nga addaan dagiti nainaganan a tattao indibidual kadagiti mapapati a pannakipaset iti "pananggun-od kadagiti pasuksok wenno di maiparbeng a pannakabenepisiar iti kuarta manipud kadagiti kontraktor ti flood control projects."
Mapukpukaw a nobia, nasarakan iti Pangasinan
"Isubmitirmi ti interim report ken rekomendasionmi iti Office of the Ombudsman... Inrekomendarmi ti pannakaipila ti kriminal ken administratibo a darum maibusor [kadakuada]," kinuna ni Reyes iti maysa a press conference.
Segun ken ni Reyes, linabsing dagitoy a tattao dagiti sumaganad:
• Direkta wenno saan a direkta a panagsuksok ken panagkunniber dagiti opisial ti publiko ibabaen ti Artikulo, 210, 211 ken 212 ti Revised Penal Code (RPC) .
• Panagkunniber dagiti opisial ti publiko iti babaen ti Section 3B ken 3E ti Republic Act (RA) No. 3019, ken
• Plunder kas nadepinar ken madusa iti babaen ti Section 2 ti RA No. 7080
Iti panangdakamatna kadagiti affidavit ken testimonia dagiti resource person a naberipikar ti ICI, kinuna ni Reyes a dagiti "nadakamat iti ngato nga opisial ti gobierno wenno dati nga opisial ti gobierno [ket nabigbig] a kangrunaan a nairaman kadagitoy a panaglabsing".
"Mangrugi ti eskema manipud iti proponent, a kameng ti Senado wenno ti Kamara dagiti Mangibagi, a mangipakaammo ken ni Engineer Alcantara nga addaan isuna (senador wenno kongresman) iti badiet a nailatang para kadagiti proyekto ti impraestruktura," kinuna ni Reyes, a ti dakdakamatenna ket ni dati a DPWH Bulacan 1st District Engineer Henry Alcantara.
Inlawlawag ni Reyes a ti eskema ket kanayon a mangiraman kadagiti flood control project "gapu ta ti kickback ket 25 aginggana ti 30 a porsiento" ket "nangatngato daytoy ngem iti kickback manipud kadagiti sabali a proyekto, nga adda laeng iti 10 a porsiento."
"Manipud ditoy, bilinen ni Engineer Alcantara ni [DPWH 1st District Assistant] Engineer [Brice] Hernandez a mangaramid ti listaan dagiti proyekto a naibatay iti badiet nga adda iti proponent. Kalpasanna, maited ti listaan iti maysa a tao nga agnagan iti Carlo Rivera, ket mangipan iti rehional nga opisina iti DPWH iti Bulacan, wenno iti proponent a mismo," inlawlawag ni Reyes.
Saan a nalawag no siasino daytoy "Carlo Rivera" a dakdakamaten ni Reyes. Adda Project Engineer John Carlo Rivera iti DPWH Bulacan 1st District a inrekomendar ti DPWH a masuspenso iti Office of the Ombudsman.
Innayon pay ni Reyes a no naiteden ti listaan iti DPWH Regional Director, mairamanen daytoy iti National Expenditure Program (NEP) wenno ti damo a langa ti national budget; ngem no ti listaan ket maited iti mismo a proponent, isu ti mang-insert wenno mangisingit kadagiti proyekto iti House General Appropriations Bill wenno HGAB, wenno bicameral insertions, a ditoy ket maipan iti General Appropriations Act (GAA) wenno ti nailian a badiet.
Segun pay ken ni Reyes, apaman a maipanen dagiti proyekto iti NEP wenno GAA, mangaramid ni Rivera iti summary dagiti proyekto, idinto a Engr. Alcantara ti mangpilin kadagiti kontraktor a mangyimplementar kadagiti proyekto. Ditoyen a marugian ti panangbayad wenno panangted iti obligasion wenno SOP (Standard Operating Procedure) iti proponent.
Kinuna ni Reyes nga adda advance payment a 10 a porsiento ti budget allocation iti proponent apaman a mairuar ti NEP, idinto a ti nabati a 15 a porsiento ket mabayadan inton maipasa ti GAA.
Kinuna ni Reyes a ingngato dagiti kontraktor iti 25 a porsiento ti bayad tapno "tapno masigurado a maited kadakuada ti proyekto." (Joseph Pedrajas/MANILA BULLETIN)
