Nakaro a didigra ti inyeg ni Bagyo Tino iti rehion ti Visayas, a nakatayan ti 66 a tao a kaaduan kadakuada ket taga-Cebu, segun iti report ti Office of Civil Defense (OCD) ita nga aldaw, Nobiembre 5.
Idardaras dagiti ahensia ti gobierno ti mangyeg iti ayuda, mangpasubli iti koriente, ken mangwaya iti kalsada iti tengnga ti panaglayus ken pannakaisina dagiti naapektaran a lugar.
Segun ken ni OCD Assistant Secretary Bernardo Rafaelito Alejandro IV, civil defense deputy administrator for administration, 49 kadagiti 66 a nailanad a natay ti naggapu iti Region 7, partikular ti probinsia ti Cebu, gapu iti nasaknap a panaglayus ken panagreggaay ti daga kadagiti komunidad iti agpatnag.
Kuna ni Alejandro iti maysa nga interbiu, maar-aramiden ti relief and response operations nga idadauluan ti Department of Social Welfare and Development (DSWD) ken ti Department of Health (DOH) para kadagiti kasapulan a medikal a tulong, idinto a ti Armed Forces of the Philippines (AFP), Philippine Coast Guard (PCG), Philippine National Police (PNP), ken Bureau of Fire Protection (BFP) ti mangisayangkat iti search, rescue, ken retrieval operations.
Senado, pinasingkedanna ti ₱6.793-trilion a nailian a badiet para 2026
Segun iti datos ti National Disaster Risk Reduction and Management Council (NDRRMC), 52 laeng ti bilang dagiti kompirmado a natay: 50 iti Central Visayas (Region 7) ken dua iti Eastern Visayas (Region 8 ). Adda 13 a mapukpukaw,ken di nababbbaba ngem iti 10 ti nadangran iti dua a rehion.
Mapan a 706,549 a tao (203,595 a pamilia) ti naapektaran iti pito a rehion, a pakairamanan ti Mimaropa (Region 4B), Bicol (Region 5), Western Visayas (Region 6), Negros Island Region (NIR), Central Visayas (Region 7), Eastern Visayas (Region 8 ), ken Caraga (Region 13).
Agdagup iti 348,554 a tao ti nagkamang kadagiti 3,894 nga evacuation center, idinto a 88,357 ti nagkamang kadagiti kabagian wenno gagayyemda. Naipakat ti preemptive evacuation kadagiti 215,190 a residente sakbay nga agdisso ti bagyo.
Kuna ti NDRRMC nga agdagupen iti ₱31.16 a milion ti balor ti tulong nga impaay ti gobierno kadagiti naapektaran a pamilia, nga idadauluan ti DSWD.
Segun ken ni Alejandro, binilin ni Presidente Marcos Jr. dagiti amin nga ahensia ti gobierno nga agtalinaedda a sisasagana para iti nasakbay a pannakaallangon dagiti biktima ti bagyo. (Martin Sadongdong/Manila Bulletin//Lito Hilidon/Bannawag)
