Bayat ti panagtultuloy a panagimbestigar ti Office of the Ombudsman (OMB) iti pannakairaman ni Senador Francis "Chiz" Escudero iti naanomalia a flood control project, natakuatanda ti makunkuna a "money trail" a mangpaneknek iti pannakairaman ti dati a senate president.
Malaksid iti daytoy, kinuna pay ni Ombudsman Jesus Crispin Remulla a kitkitaenda ti dadduma pay nga ebidensia, ta no awan ti makitada iti Anti-Money Laundering Council (AMLC), rumbeng a sukimatenda dagiti "cash trail."
Iti sabali a bangir, kinuna ni Remulla a masapul a mapagsungbat ni dati nga Speaker of the House Martin Romualdez mainaig kadagiti naanomalia a flood control project gapu iti pannakadutok ti naglusulos nga Ako Bikol Partylist Representative a ni Zaldy Co a kas chairman ti komite ti appropriations ti Kamara.
Maibasar iti panagimbestigar ti OMB, natakuatanda ti maysa a disenio a nakikoordinar ni Co kadagiti senador iti pannakabukel ti pinal a bersion ti national budget.
Senado, pinasingkedanna ti ₱6.793-trilion a nailian a badiet para 2026
Segun ken ni Remulla, ni Romualdez ti akimbasol iti pannakadutok ni Co, a nupay nabotosan iti plenario ti Kamara, ammo met ti amin nga isu ti pinili ni Romualdez, isu nga adda latta sungsungbatanna iti daytoy.
Kuna ni Remulla a no awan ti krimen iti dayta a naaramid, adda latta makuna a panangbaybay-a ni Romualdez kas daulo ti Kamara idi nadutokan ni Co. (Czarina Nicole Ong Ki/Manila Bulletin//Lito Hilidon/Bannawag)
