Nagdisso ni Bagyo Tino (international name: Kalmaegi) iti El Nido, Palawan itay 4:40 iti parbangon, Nobiembre 5, segun iti Philippine Atmospheric, Geophysical and Astronomical Services Administration (PAGASA).
Daytoyen ti maikawalo a panagdisso ni Tino iti daga iti ilalabasna iti Philippine Area of Responsibility (PAR).
Immuna a nagdisso ni Tino iti Silago, Southern Leyte iti 12:00 ti tengnga ti rabii ti Nobiembre 4; sa iti Borbon, Cebu idi 5:00 iti parbangon idi NObiembre 4; iti Siudad ti Sagay iti Negros Occidental idi 6:40 iti agsapa idi Nobiembre 4; iti San Lorenzo, Guimaras idi 11:10 iti aldaw idi Nobiembre 4; iti Siudad ti Iloilo, Iloilo idi 1:20 iti malem idi Nobiembre 4; iti Cuyo Islands, Palawan iti 7:30 iti rabii idi Nobiembre 4; ken iti Batas Island, Taytay, Palawan iti 4:10 iti parbangon ita a Nobiembre 5.
Segun iti PAGASA, kumapkapsut ni Tino sipud idi damona ti agdisso iti daga, ngem pinagtalinaedna ti pigsana a 120 a kilometro kada oras iti asideg ti sentrona, ken pugso nga agingga iti 165 a kilometro kada oras.
Pannakakombiktar ti tallo a polis a nangpapatay ken ni Kian delos Santos, pinatalgedan ti Korte Suprema
Agtalinaed iti Signal No. 4 ti amianan a paset ti Palawan (El Nido, Taytay, Araceli) ken Calamian Islands; idinto a Signal No. 3 iti amianan ti Palawan (Dumaran, San Vicente, Roxas) ken Cuyo Islands.
Agtultuloy ti Signal No. 2 iti abagatan ti Occidental Mindoro (Magsaysay, San Jose, Rizal, Calintaan) ken sentro ti Palawan (Puerto Princesa City), agraman Kalayaan Islands; ken Signal No. 1 iti dadduma a paset ti Occidental Mindoro, agraman ti Lubang Islands, Oriental Mindoro, abagatan a paset ti Romblon (Santa Fe, Looc, San Jose, Ferrol), ken abagatan ti Palawan (Aborlan, Quezon, Narra, Sofronio Española), agraman Cagayancillo Islands, Antique, agraman ti Caluya Islands, ken amianan a laud ti Aklan (Buruanga, Malay, Nabas).
Agpalaud-amianan a laud ni Tino iti West Philippine Sea (WPS) ken rummuar iti PAR ita a Mierkoles iti rabii wenno iti agsapa ti Nobiembre 6. (Ellalyn De Vera-Ruiz/Manila Bulletin//Lito Hilidon/Bannawag)
