Nagballaag ti Philippine Atmospheric, Geophysical and Astronomical Services Administration (PAGASA) ita nga aldaw, Nobiembre 5, a posible nga agbalin a super typhoon ti maysa a tropical depression nga adda iti ruar ti Philippine Area of Responsibility (PAR) itoy a ngudo ti lawas.
Kinuna ni PAGASA weather specialist Benison Estareja nga itay 10:00 iti aldaw, nasaripatpatanda ti tropical depression iti 1,870 a kilometro iti amianan a daya ti Mindanao, nga agpigsa iti 55 a kilometro kada oras iti asideg ti sentrona ken pugso nga agingga iti 70 a kilometro kada oras, ken agpadaya iti kapardas a 10 a kilometro kada oras.
Awan pay ti direkta nga epekto ti tropical depression iti ania man a paset ti pagilian, ta adda pay lang iti taaw daytoy.
Segun iti PAGASA, manamnama a sumrek iti PAR ti dawel ti panawen inton Sabado iti agsapa, Nobiembre 8, ket managanan daytoy iti "Uwan."
Kasapulan ti natibker ken nainkalintegan a pagtaktakderan iti parikut iti WPS --NMC
Gapu ta adda pay laeng iti Pacific Ocean, mabalin a pumigsa pay daytoy ken agbalin a bagyo wenno super typhoon apaman a sumrek iti pagilian.
Agturong ti dawel ti panawen iti laud-amianan a laud ti Northern wenno Central Luzon ken mabalin nga agdisso iti kadaklan ti Cagayan wenno iti Aurora inton Lunes iti agsapa, Nobiembre 10.
Kuna ni Estareja a gapu ta adda posibilidadna nga agbalin a super typhoon, mabalin a mapasaran ti napigsa nga angin nga agarup 185 a kilometro kada oras agingga iti 195 a kilometro kada oras, a napigpigsa ngem ni kalablabasna a Bagyo Tino.
Innayon ni Estareja a saan pay a masigurado no sadino ti eksakto a turongen ti dawel ti panawen, ta adda met posibilidadna nga agpaamianan daytoy ket mapan iti Batanes, wenno agpaabagatan ket tuparenna ti Bicol Region.
Kinuna ti PAGASA a mabalin nga agbaliwbaliw ti tignay ti tropical depression iti sumaruno a 24 wenno 48 nga oras sakbay nga agpaamianan a laud inton Huebes, Nobiembre 6, sa agpalaud-amianan a laud kalpasanna.
Bayat ti yaasideg ti tropical depression, mabalin a maipakat ti tropical cyclone wind signals (TCWS) iti daya a paset ti Luzon ken ti dadduma a paset ti Samar inton Biernes (Nobiembre 7) iti rabii, wenno Sabado (Nobiembre 8 ) ti agsapa, kas panangsakbay kadagiti napigsa nga angin.
Agingga iti Signal No. 5 ti kangatuan a pakdaar a mabalin nga ipakat ti PAGASA, maibasar iti agdama a panangpattapatta ti PAGASA. (Ellalyn De Vera-Ruiz/Manila Bulletin//Lito Hilidon/Bannawag)
