Bayat ti iruruar ni Bagyo Tino (international name: Kalmaegi) iti Philippine Area of Responsibility (PAR), nagbalinen a bagyo ti tropical depression nga adda iti ruar ti pagilian, segun iti Philippine Atmospheric, Geophysical and Astronomical Services Administration (PAGASA) ita nga aldaw, Nobiembre 6.
Itay 4:00 iti parbangon, adda ti sentro ni Bagyo Tino iti 265 a kilometro iti amianan-amianan a laud iti Pag-asa Island iti Kalayaan, Palawan, agpalaud-amianan a laud iti kapardas a 35 a kilometro kada oras.
Pimmigsa pay ni Tino iti kaaddaana iti West Philippine Sea, iti 155 a kilometro kada oras iti asideg ti sentrona ken pugso nga agingga iti 190 a kilometro kada oras.
Iti sabali a bangir, nagbalinen a bagyo ti tropical depression iti ruar ti PAR ken addaan internasional a nagan a “Fung-wong.”
Senado, pinasingkedanna ti ₱6.793-trilion a nailian a badiet para 2026
Itay 4:00 iti parbangon adda daytoyen iti agarup 1,715 a kilometro iti daya ti amianan a daya ti Mindanao, agpa-amianan a laud iti kapardas a 20 a kilometro kada oras, ken agpigsa iti 65 a kilometro kada oras ken pugso nga agingga iti 80 kada oras.
Segun iti PAGASA, agtultuloy ni Fung-wong nga agpaamianan a laud agingga inton Biernes, Nobiembre 7, sakbay nga agbaw-ing iti laud-amianan a laud.
Ekspektaren ti PAGASA a sumrek ni Fung-wong iti PAR iti Biernes ti rabii, wenno agsapa ti Sabado, Nobiembre 8, ken mabalin a pumigsa pay ket agbalin a super typhoon inton Sabado.
Managanan daytoy iti “Uwan” apaman a makastrek iti PAR.
Impakdaar ti PAGASA ti napeggad a dawel ti panawen no maragpat ti bagyo ti kapigsaanna ken agdisso iti Northern wenno Central Luzon. (Ellalyn De Vera-Ruiz/Manila Bulletin//Lito Hilidon/Bannawag)
