Pimmigsa ti bagyo nga addaan iti internasioal a nagan a “Fung-wong,” ket nagbalinen a severe tropical storm bayat ti kaaddana iti Pacific Ocean, segun iti Philippine Atmospheric, Geophysical and Astronomical Services Administration (PAGASA), ita nga aldaw, Nobiembre 7.
Itay 4:00 iti parbangon, nasaripatpatan ti PAGASA ni Fung-wong iti 1,525 a kilometro iti daya ti amianan a daya ti Mindanao, nga agpigsa iti 95 a kilometro kada oras iti asideg ti sentrona ken pugso nga agingga iti 115 a ilometro kada oras. Agpaamianan a laud daytoy iti kapardas a 10 a kilometro kada oras.
Segun ken ni PAGASA weather specialist Loriedin de la Cruz-Galicia, dakkel ti posibilidad a pumigsa pay ni "Fung-wong" bayat ti panagtalinaedna iti baybay gapu iti kinaginadna, ken agbalin a super typhoon.
Maekspektar a sumrek ni Fung-wong iti Philippine area of responsibility (PAR) ita a rabii ti Biernes, Nobiembre 7, wenno inton Sabado ti agsapa, Nobiembre 8, ket managananto daytoy iti Bagyo “Uwan.”
Mapukpukaw a nobia, nasarakan iti Pangasinan
Mabalin nga agdisso ti bagyo iti Northern wenno Central Luzon, ngem ti nasaknap a sirkulasion ti bagyo ti mangyeg iti napigsa nga angin ken bayakabak kadagiti dakkel a lugar.
Kuna ni Galicia nga 400 a kilometro manipud iti sentrona ti kadakkel ti bagyo, a kaipapananna, dandani saknapenna ti entero a Luzon ken ti dakkel a paset ti Visayas.
Agingga iti Signal No. 5 ti mabalin nga ibayog ti PAGASA no agbalinen a super typhoon ni Fung-wong.
Mangrugi a marikna ti napigsa a tudo inton Domingo, Nobiembre 9, idinto a marikna napeggad a dawel ti panawen iti Northern Luzon ken dadduma a paset ti Central Luzon inton Lunes (Nobiembre 10) ken Martes (Nobiembre 11). (Ellalyn De Vera-Ruiz/Manila Bulletin//Lito Hilidon/Bannawag)
