Immaboten iti 27 ti bilang dagiti natay gapu ken ni Super Typhoon “Uwan” kalpasan a nakaala dagiti autoridad iti 9 pay a bangkay, kas kinompirmar ti Office of Civil Defense (OCD) ita a Mierkoles, Nobiembre 12.
Segun iti kaudian a datos, ti probinsia ti Ifugao iti Cordillera Administrative Region (CAR) ti kangatuan iti bilang dagiti natay, nga addaan iti 9, sinaruno ti Benguet nga addaan iti 4, ti Mountain Province ken Kalinga nga addaan iti saggatlo, ken tallo iti Nueva Vizcaya iti Cagayan Valley (Region 2).
Saggaysa met ti natay iti Catanduanes, Capiz, Samar, ken Sulu. Maysa pay a bangkay a di pay nabigbig ti natunton iti saan pay a nainaganan a probinsia.
Mapukpukaw a nobia, nasarakan iti Pangasinan
Dua a tattao ti nai-report a mapukpukaw pay laeng, nga agpada a taga-Kalinga, idinto a 36 ti nadunor iti Benguet, Ifugao, Quezon, ken Catanduanes.
“Immadu iti CAR, manipud iti CAR dagiti nainayon a natay,” kinuna ni OCD Deputy Administrator for Administration, Assistant Secretary Bernardo Rafaelito Alejandro IV.
Segun kenkuana, kaaduan kadagiti kabarbaro a nasarakan a natay ket naggapu kadagiti nangangato a lugar a naynay ti panagreggaay ti daga.
Maibasar iti report ti OCD, 1,006,149 a pamilia wenno 3,596,174 a tattao ti naapektaran iti 9,643 a barangay iti 16 a rehion a pakairamanan ti National Capital Region (NCR), CAR, Ilocos (Region 1), Cagayan Valley (Region 2), Central Luzon (Region 3), Calabarzon (Region 4A), Mimaropa (Region 4B), Bicol (Rehion 5), Western Visayas (Rehion 6), Negros Island Region (NIR), Eastern Visayas (Region 8), Zamboanga Peninsula (Region 9), Northern Mindanao (Region 10), Soccsksargen (Region 12), Caraga (Region 13), ken Bangsamoro Autonomous Region in Muslim Mindanao (BARMM).
Kadagitoy, 171,786 a pamilia wenno 623,310 a tattao ti naibakwit ket temporario nnga adda iti 9,014 nga evacuation center idinto a 84,524 a pamilia wenno 296,035 a tattao ti naipaayan iti tulong iti ruar dagitoy a pasilidad.
Segun iti kaudian nga update, 277 kadagiti 625 nga apektado a kalsada ken 61 kadagiti 78 nga apektado a rangtay ti saan pay a malasat.
Awan pay met ti koriente iti 410 kadagiti 497 nga apektado a lugar idinto a 18 kadagiti 29 nga apektado a lugar ti saan pay a naisubli ti suplayda a danum. Saan pay met a naisubli dagiti linia ti komunikasion iti amin a 121 nga apektado a lugar, a pakairamanan ti 88 a lugar iti Eastern Visayas.
Agdagup iti 41,202 a balbalay ti naipadamag a nadadael iti Region 1, 2, CAR, 4B, 5, 6, 8, 9, 12, Caraga, ken BARMM.
Idinto nangibati ni "Uwan" iti nasaknap a pannakadadael, nababbaba ketdi nga amang ti bilang dagiti natay ngem iti bilang dagiti biktima ni Bagyo “Tino.”
Iti agdama, addan 232 ti bilang dagiti natay gapu ken ni "Tino" ket adda pay laeng 112 a tattao a mapukpukaw iti Visayas ken Mindanao.
Ti Cebu ti nakaro nga inapektaran ni "Tino," a nakatayan ti 150 a tattao, sinaruno ti Negros Occidental nga addaan iti 42 a natay, ken Negros Oriental nga addaan iti 21. Innem ti natay itii Agusan del Sur; tallo iti Capiz; sagdudua iti Dinagat Islands, Southern Leyte, ken Leyte; ken saggaysa iti Antique, Iloilo, Guimaras, ken Bohol. (Martin Sadongdong/MANILA BULLETIN)
