Linuktan manen ti Department of Public Works and Highways (DPWH) ti Buntun Bridge iti Siudad ti Tuguegarao, Cagayan sumagmamano nga oras kalpasan a naiserra daytoy iti trapiko idi Martes, Nobiembre 11, gapu iti panagngato ti danum iti Cagayan River a ginubuay dagiti nakaro a panaglayus iti nadumaduma a probinsia iti Rehion 2 maigapu ken ni bagyo nga “Uwan.”
Temporario a naserraan ti pinulpullo ti tawennan a rangtay kalpasan a nadanon ti danum ti kritikal a lebel a 12 a metro.
Ngem kinuna ti DPWH a agtalinaed ti load limit a 15 a tonelada ken restriksion kadagiti nadagsen a lugan.
Kasapulan dagitoy tapno masigurado ti kinatalged ti publiko ken mataginayon ti structural integrity ti rangtay, kinuna ti DPWH.
Maika-176 nga anibersario ti pannakabangon ti La Union, marambakan
Kinuna ti DPWH a maiparit a sumrek iti rangtay amin a trak ken trailer-trucks ken dagiti fully loaded a bus ken imbalakadda nga usaren dagitoy dagiti alternate routes (Liezle Basa Iñigo/MB)
