Kimmapuy ken nagbalin laengen a severe tropical storm ni bagyo nga "Uwan" (Fung-wong) bayat ti panagtalinaedna iti ruar ti Philippine Area of Responsibility (PAR), ngem agtultuloy ti panangapektar ti napigsa nga angin kadagiti paset ti Northern Luzon, segun ti Philippine Atmospheric, Geophysical and Astronomical Services Administration (PAGASA).
Manipud idi alas onse iti bigat idi Martes, Nobiembre 11, addan ti sentro ni Severe Tropical Storm Uwan, 370 kilometro iti laud-amianan a laud ti Calayan, Cagayan, wenno ruar ti PAR.
Aggargaraw daytoy iti amianan-amianan a laud iti kapartak a 10 kilometro iti kada oras (kph) nga addaan iti maximum sustained winds a 110 kph iti asideg ti sentro ken pugso nga agingga iti 135 kph.
Kinuna ti PAGASA a kimmapuy ni Uwan gapu iti saan a paborable a kasasaad ti aglawlaw ken maekspektar nga agtultuloy a kumapsut.
Mapukpukaw a nobia, nasarakan iti Pangasinan
Kinuna ti PAGASA a mabalin a sumrek manen ni Uwan iti PAR ita a malem ti Mierkoles, Nobiembre 12, gapu ta ag-landfall daytoy iti abagatan a laud a igid-baybay ti Taiwan.
Kalpasanna, agturong daytoy iti baybay iti asideg ti Ryukyu Islands inton Huebes, Nobiembre 13, ket sadiay a posible nga ad-adda a kumapsut ket agballinto laengen a low pressure area (LPA) inton Biernes, Nobiembre 14.
Iti laksid ti iruruarna iti PAR, kinuna ti PAGASA a mabalin a mapasaran pay laeng ti napigsa nga angin iti sumagmamano a lugar iti Northern Luzon.
Adda pay laeng iti Tropical Cyclone Wind Signal No. 1 ita nga aldaw, Nobiemre 12, ti Batanes, Babuyan Islands (Calayan, Dalupiri, Fuga), ken ti amianan a laud a paset ti Ilocos Norte (Burgos, Bangui, Pasuquin, Dumalneg, ken Pagudpud). (Ellalyn De Vera-Ruiz/MB)
