Kinompirmar ti Department of Education (DepEd) idi Mierkoles, Nobiembre 12. ti nasaknap a pannakasinga dagiti klase iti Northern ken Central Luzon, kalpasan ti panangbegbeg ni Super Typhoon "Uwan," a nakadadaelan ti adu a pagadalan ken nangpukaw iti pagtaengan dagiti rinibu nga adalan ken mannursuro.
Maibasar iti kaudian a report ti DepEd, adda 913,777 nga adalan iti 18 nga school division ken lima a rehion, a pakairamanan ti Cordillera Administrative Region (CAR) ken dadduma a paset ti Rehion I, II, ken III, a nasuspenso pay laeng ti klaseda agingga ita.
Adda 2,953 a pagadalan ti nagsagrap iti nadumaduma a nibel ti pannakadadael, agraman ti 10,400 a siled-pagadalan a saan unay a nadadael, 3,503 ti dakkel ti perdina, ken 1,968 ti interamente a nadadael.
Pattapattaen ti DepEd nga agdagup iti ₱151.5 a milion ti magasto para iti clean-up and clearing operations, idinto a ₱509.6 a milion ti kasapulan para kadagiti bassit a panagtarimaan.
Mapukpukaw a nobia, nasarakan iti Pangasinan
Tapno mataming ti kasapulan dagiti naapektaran a pagadalan, pinaggunay ti DepEd ti Disaster Risk Reduction and Management (DRRM) team kadagiti field office a mangisayangkatda iti rapid damage and needs assessments (RDNA).
Innayon ti DepEd a makikoordinarda kadagiti kaasmangda nga ahensia tapno maisubli iti normal ti pannakaipaay iti edukasion, mapapigsa ti panagsagana dagiti pagadalan, ken mangan-anay iti kinatibker dagiti impraestruktura tapno masigurado a natalged ti pagadalan para kadagiti adalan ken empleadoda. (Merlina Hernando-Malipot/Manila Bulletin//Lito Hilidon/Bannawag)
