Agdagupen iti ₱307.5 a milion ti balor dagiti nadadael gapu iti panangbegbeg ni Super Typhoon "Uwan" iti Nueva Vizcaya, kuna ti Provincial Disaster Risk Reduction Management Office (PDRRMO) ita nga aldaw, Nobiembre 13.
Segun iti partial report ti PDRRMO, ₱250 a milion ti pukaw iti sektor ti agrikulura, ₱53.7 a milion iti impraestruktura ti probinsia, ken ₱3.8 a milion a balor dagiti taraken nga ayup.
Inlawlawag ti PDRRMO a saan pay a pinal dagitoy a datos, ket mabalin pay nga agbaliw, idinto a maar-aramid latta ti inspeksion.
Innayon ti PDRRMO a dagiti napattapatta a balor iti impraestruktura ket dagiti laeng adda iti babaen ti gobierno probinsial, ket saan a nairaman dagiti kalsada, pasdek, wenno pasilidad nga imatmatonan ti nailian a gobierno ken gobierno lokal.
Camalaniugan-Aparri Bridge, inaguraran ni Marcos
Iti sabali a bangir, kinompirmar ti Nueva Vizcaya Provincial Police Office (NVPPO) nga uppat ti natay -- a pakairamanan ti agtawen iti lima a singin manipud iti Kayapa, 10 ti tawenna nga ubing iti Kasibu, ken ti 30 ti tawenna a lalaki manipud iti Quezon -- gapu iti panagreggaay a ginubuay ti bagyo.
Tallo nga ili ti saan pay a madanon gapu kadagiti nadadael a kalsada ken rangtay: Alfonso Castañeda, Kayapa, ken Kasibu.
Nangibaonen ni Gobernador ti Nueva Vizcaya Atty. Jose V. Gambito iti nayon nga alikamen, babaen ti Provincial Engineering Office, a tumulong iti pannakaallangon dagiti naapektaran a komunidad.
Nagyaman ni Gambito kadagiti ahensia ti gobierno, nagresponde, ken nagboluntario a tumulong gapu iti napardas a panangtulongda iti panagresponde ti gobierno probinsial. (Rachel Magday/PLGU Nueva Vizcaya Page//Lito Hilidon/Bannawag)
