Nupay saan a dimmar-ay iti sesion ti Senado iti kallabes, nagparikna ni Senador Ronald "Bato" Dela Rosa iti social media, a nangibinglay iti kapanunotanna.
Dua a paskil iti dua a Facebook account-na ti imbinglay ni Dela Rosa ita nga aldaw, Nobiembre 13: maysa ti mangipakpakita a nakaiggem isuna iti rebulto ti Santo Niño, ket ti sabali, mangipakpakita a kaduana ni Father Cianno Ubod ti Compostela Parish Church iti Cebu.
Iti ladawan ni Dela Rosa nga iggemna ti Santo Niño, impaskilna ti santo a padron ken segun kenkuana, ka-birthday-na daytoy iti Enero.
Iti met ladawan a kaduana ni Ubod, impaskil ni Dela Rosa: "Iti kastoy a tiempo, masapul a paiwanwantayo iti spiritual adviser-tayo. Agyamanak, Father Ciano.”
Marcos, Robredo, nagsarak iti Naga city
Itay napan a lawas, nangipaskil ni Dela Rosa iti ladawanna a tumultulong kadagiti naapektaran ti bagyo iti Cebu, ngem saan a kinompirmar dagiti empleadona no adda pay isuna iti probinsia.
Itay nabiit, kinuna ti abogado ni Dela Rosa a ni Atty. Israelito Torreon nga ammoda ti agwarwaras a report nga addan warrant of arrest nga impaulog ti International Criminal Court (ICC) kontra iti senador.
Nupay kasta, inlawlawag ni Torreon a saanda pay a napatalgedan no pudno ti naawatda nga impormasion ngem pinakdaaranna ti publiko ken ti media nga agbalin a naridam ken naannad iti panangibinglay wenno panangpatarusda iti kakastoy a report agingga a saan pay a pinatalgedan daytoy ti ICC wenno ti umisu nga autoridad.
"No agpayso, talkenmi nga agtignay ti gobierno ti Filipinas kas mayannatup iti linteg ken ti kastoy a tignay ket masapul nga agdalan pay nga umuna iti umno a panangkompirmar ti korte ti pagilian kas maitunos iti Konstitusion, " kuna ni Torreon iti maysa nga statement.
Naidarum ni Dela Rosa iti kaso a crime against humanity gapu iti nagbalin nga akemna kas hepe ti Philippine National Police (PNP) idi impakat ni dati a presidente Rodrigo Duterte ti war on drugs a nakapapatayan ti rinibu a tattao. (Hannah L. Torregoza/Manila Bulletin//Lito Hilidon/Bannawag)
