Kiniddaw ni Senador Ronald “Bato” Dela Rosa iti Korte Suprema (SC) a lapdanda koma ti gobierno a mangipatungpal iti warrant of arrest, no adda ipaulog ti International Criminal Court (ICC) kontra kenkuana.
Iti impila ni Dela Rosa iti SC, kiniddawna a bilinenda koma ti Department of Justice (DOJ) ken ti Department of Foreign Affairs (DFA) a mangidatag iti sertipikasion a mangilibak wenno mangpatalged nga addan impaulog iti ICC a warrant of arrest.
Dimmatag ni Dela Rosa iti SC gapu iti imbaga ni Ombudsman Jesus Crispin Remulla nga addan ti warrant of arrest ni Dela Rosa manipud iti ICC.
Segun ken ni Dela Rosa, saan a rumbeng nga isuko a dagus ti gobierno ti Filipinas ti asino man iti ICC nga awan ti pammilin ti korte ta maysa daytoy a panaglabsing, saan laeng nga iti linteg ti pagilian, no di ket iti pay linteg iti internasional.
Senado, pinasingkedanna ti ₱6.793-trilion a nailian a badiet para 2026
Innayon ni Dela Rosa a saan a rumbeng nga agpannuray ti gobierno iti Section 17 ti Republic Act No. 9851 wenno ti Philippine Act on Crimes Against International Humanitarian Law, Genocide, and Other Crimes Against Humanity -- a kas legal a pagbatayanda iti panangisukoda kenkuana, ta amangan no usaren daytoy ti Ehekutibo a pagbatayan tapno isukoda dagiti Filipino kadagiti ganggannaet, no kayatda. (Rey G. Panaligan/Manila Bulletin//Lito Hilidon/Bannawag)
