Nasuroken a ₱2.8 a bilion ti balor ti nadadael iti agrikultura ken impraestruktura gapu iti Bagyo Uwan ken Tino, segun iti National Disaster Risk Reduction and Management Council (NDRRMC) ita nga aldaw, Nobiembre 14.
Maibasar iti panangtingiting ti Department of Agriculture (DA), agdagup iti ₱174,674,174.96 ti napukaw iti agikultura idinto a ₱170,400,000 ti balor dagiti nadadael nga irigasion, segun iti report ti National Irrigation Administration (NIA). Mapan a ₱1,705,654,020.27 ti balor ti nadadael nga impraestruktura, a pakadagupan ti ₱2,050,728,195.23 a balor ti nadadael gapu iti Super Typhoon Uwan.
Iti sabali a bangir, nangibati ni Bagyo Tino iti ₱327,511,453.42 a balor ti napukaw iti agrikultura, idinto a ₱483,013,585.96 ti balor ti nadadael iti impraestruktura, a pakadagupan ti ₱810,525,039.38.
Agdagup iti ₱2,861,253,234.61 ti balor ti dinadael dagiti nabiit pay a nagsaruno a bagyo, a nangapektar kadagiti taltalon, kalsada, rangtay, ken dadduma pay a pasilidad iti nadumaduma a rehion. (Martin Sadongdong/Manila Bulletin//Lito Hilidon/Bannawag)
