Inkeddeng ti Korte Suprema (SC) a saan a nalabsing ti kalintegan dagiti vlogger iti siwawaya a panagsaoda idi inawis ida ti Kamara para iti legislative inquiry mainaig iti panagwaras ti fake news iti internet.
Iti pangngeddeng ti SC nga insurat ni Associate Justice Amy C. Lazaro-Javier, winaswasda ti petision nga indatag dagiti sumagmamano a vlogger a ken nagkiddaw iti SC a pasardengenda koma ti Kamara a mangayab kadakuada kas resource person.
Nagpetision dagiti vlogger a da Ernesto S. Abines Jr., abogado Glenn Chong, Mark Antony Lopez, Mary Jean Q. Reyes, Dr. Richard T. Mata, Mary Catherine Diaz Binag, Ethel Pineda Garcia, Krizette Laureta Chu, Jonathan A. Morales, Lorraine Marie Badoy-Partosa, Rose Beatrix L. Cruz-Angeles, Aeron S. Pena, Nelson U. Guzmanos, Elizabeth Joie Cruz, Suzanne Batalla, Kesten John Tan, ken George Ahmed G. Paglinawan, ket kiniddawda iti SC a paritanda koma ti Kamara a mangimbitar kadakuada iti legislative inquiry maigapu kadagiti paskilda iti social media, ta salungasingen daytoy ti kalinteganda iti siwawaya a panagsao.
Inlawlawag ti SC a saan a rumbeng a malapdan ti Kamara a mangawis kadagiti resource person maipaay iti legislative inquiry gapu laeng ta maipanggep iti panagsao ti dakamatenda.
DOH, namakdaar iti posible a pannakadangran iti Traslacion
Kuna ti SC nga adda karbengan ti Kamara a mangbukel iti linteg a mangdusa iti klase ti panagsao a saan a salakniban ti Konstitusion, kas iti mangpataud iti riribuk ken pangta iti kagimongan.
Innayon ti SC a saan a nalabsing ti kalintegan dagiti vlogger nga agsao gapu laeng ta naawisda kas resource person, ta saan met a nakedngan no ania dagiti rumbeng nga isawangda ken no kasano ti panangipeksada iti bagida.
Inlawlawag ti SC a paset ti pagrebbengan ti Kamara ti agkalap iti adu nga impormasion tapno mabukelda ti paglintegan, saan a tapno dusaenda ti asino man a mangiwaras iti fake news wenno manglapped iti panagsaoda.
Inkeddeng ti SC a nagtignay ti Kamara a maitunos iti karbenganda idi insayangkatda ti legislative inquiry tapno agsapulda iti wagas a mangtaming iti panagwaras ti palso wenno makaallilaw nga impormasion, a mangdadael iti panagtalek ti publiko ken pangta iti kinatalged ti kagimongan. (Rey G. Panaligan/Manila Bulletin//Lito Hilidon/Bannawag)
