Nagladingit dagiti senador iti ipupusay ni dati a senate president ken presidential chief legal counsel Juan Ponce Enrile, iti tawenna a 101, idi Nobiembre 13.
Kas paset ti tradision, insardeng pay laeng ti Senado ti sesionda agingga inton Lunes, Nobiembre 17, iti 1:00 iti malem.
Kinompirmar ti anak ni Enrile a ni Katrina Ponce Enrile a pimmusayen ti amana, idi malem ti Huebes, Nobiembre 13.
Kinuna ni Senate President Vicente "Tito" Sotto III nga indedikar ni Enrile ti entero a biagna, agingga iti maudi nga aldawna, iti panagserbi iti publiko.
Marcos, Robredo, nagsarak iti Naga city
"Malaglagiptayo isuna gapu iti kinasaririt ken panagayatna iti tao, nangruna kadagiti empleado ti Senado," kuna ni Sotto.
"Ti nangato a legal a panunot" ti panangawag ni Senate Majority Leader Juan Miguel "Migz" Zubiri iti pimmusay a ni Enrile, a nabayag a nagpaay a public servant nga addaan nasaririt ken natibker a presensia a nangsukog iti adu a paset ti pakasaritaan ti pagilian.
Kinuna met ni Sen. Lito Lapid a napukaw ti pagilian ti maysa a nalaing ken nasirib a mammanday-linteg, a maysa kadagiti natibker a personalidad iti historia ti pagilian.
Segun ken ni Lapid, nagpaay ni Enrile iti tallo a paset ti gobierno: kas executive secretary, Minister of National Defense, kameng ti Kamara, ken kangrunaanna, kas senador ken senate president iti maika-15 a Kongreso. (Dhel Nazario/Manila Bulletin//Lito Hilidon/Bannawag)
