Saan nga inkankano ni Presidente Marcos Jr. dagiti alegasion ni dati nga Ako Bicol Party-list Rep. Zaldy Co, a ti presidete ti nangisingit iti ₱100 a bilion a pondo kadagiti proyekto a para iti impraestruktura iti 2025 budget.
"Diak kayat a padayawan ti ibagbagana," kinuna ni Marcos kadagiti kameng ti media iti Negros Occidental ita nga aldaw, Nobiembre 15.
Iti video nga impaskil ni Co iti Facebook, inulitna ti alegasionna kontra ken ni Marcos, ken nangiparang pay iti ladawan dagiti maleta a kunana a naglaon iti kuarta a maideliber iti pagtaengan ti presidente.
Sinupiat ni Sekretario ti Presidential Communications Office (PCO) Dave Gomez ti imbagbaga ni Co iti maikadua a video, ket kunana nga inulit laeng ni Co dagiti alegasionna kontra ken ni Marcos nga awanan pulos ti ebidensia.
Senado, pinasingkedanna ti ₱6.793-trilion a nailian a badiet para 2026
Segun ken ni Gomez, awan ti naiparang ni Co a baro nga impormasion wenno dokumento iti maikadua a video daytoy.
Kinuna ti maysa a civic leader a ni Jose Antonio Goitia a saan a sinuportaran ti ebidensia dagiti alegasion ni Co nupay inruarna ti listaan dagiti proyekto ken online statement, ket impaganetgetna nga awan kadagitoy a banag ti mangikonektar ken ni Marcos iti ibagbagana a ₱100 a bilion nga insertion, idinto ta awan ti naiparang a direktiba wenno ania man a banag manipud iti Malakanyang.
Kinuestionar ni Goitia ti desision ni Co nga agsao manipud iti ballasiw-taaw imbes ketdi nga agparang kadagiti opisial a panagimbestigar wenno mangiruar iti sinapataanna a salaysay iti Filipinas. (Argyll Cyrus Geducos/Manila Bulletin//Lito Hilidon)
