Mangrugi a marikna ti pul-oy ti northeast monsoon, wenno ti amian (amihan) kadagiti nadumaduma a paset ti Northern ken Central Luzon inton Nobiembre 18, segun iti Philippine Atmospheric, Geophysical and Astronomical Services Administration (PAGASA).
Kuna ti PAGASA nga ita pay laeng a Lunes, Nobiembre 17, naulep a tangatang nga addaan sangkabassit a tudo ti mapaspasaran iti Ilocos Region, Cordillera Administrative Region, Batanes, Nueva Vizcaya, ken Quirino, gapu iti amian.
Segun ken ni PAGASA weather specialist Daniel James Villamil, ti panangsaknap ti amian ti mangpalamiis iti angin kadagiti adu a paset ti Luzon iti mapasungad nga aldaw.
Manipud Martes (Nobiembre 18) agingga iti Mierkoles (Nobiembre 19), maekspektar ti panagtudo iti abagatan a Mindanao ken iti dayaen a paset ti Luzon ken Visayas.
Senado, pinasingkedanna ti ₱6.793-trilion a nailian a badiet para 2026
Manipud Huebes (Nobiembre 20) agingga iti Biernes (Nobiembre 21), mapasaran iti Northern Luzon ti naangep a tangatang, idinto a naulep a tangatang nga addaan iti bassit a panagtudo ti mapasaran iti Aurora, Quezon, ken Bicol Region.
Innayon ni Villamil nga awan ti bagyo a sumrek wenno mabukel iti Filipinas iti sumaruno a tallo wenno lima nga aldaw. (Ellalyn De Vera-Ruiz/Manila Bulletin//Lito Hilidon/Bannawag)
