Inyunay-unay ti relihioso a grupo nga Iglesia ni Cristo (INC) a ti pannakaipaay ti konkreto a solusion manipud iti nailian a gobierno a mangparmek iti panagkunniber ti kidkiddawen ti tallo nga aldaw a "Rally for Transparency and a Better Democracy," saan a ti panangtippuog iti agdama nga administrasion.
Dagitoy ti sinao dagiti opisial ti INC kalpasan ti umuna nga aldaw ti ralida a naangay iti Quirino Grandstand iti Siudad ti Manila a dinar-ayan ti nasurok a 630,000 a kamengda, segun iti panangkita ti Manila Police District (MPD).
"Kayatmi nga agbalin a nalawag para iti amin, saanmi a tarigagayan a tippuogen ti gobierno kas maysa nga institusion... ti kayattayo ket ti pannarippuog ti panagkunniber. Ti kayattayo ket ti pannakaitandudo ti gobierno a napudno ken mangisakit kadagiti umili," kinuna ni INC general evangelist Bienvenido Santiago Jr.
Inlawlawag ni Santiago a dagiti dakes ken rinuker nga opisial ti rumbeng a maikkat, saan a ti gobierno a mangsalaknib iti kalintegan dagiti umili.
Mapukpukaw a nobia, nasarakan iti Pangasinan
Impaganetget ni Santiago a saan a pangggep ti protestada ti mangpataud iti riribuk ken maris iti politika.
Iti umuna nga aldaw ti rali idi Domingo, Nobiembre 16, linapdan dagiti INC dagiti ralista a pasurot ni Duterte a makitipon kadakuada iti Quirino Grandstand gapu ta adda iggemda a karatula a mangkidkiddaw iti panaglusulos ni Presidente Marcos Jr.
Gapuna, nagturong laengen dagiti maka-Duterte a grupo iti Liwasang Bonifacio ket inangayda sadiay ti bukodda a rali.
Agpaut ti protesta dagiti INC iti Quirino Grandstand agingga inton Martes, Nobiembre 18. (Patrick Garcia/Manila Bulletin//Lito Hilidon//Bannawag)
