Rinibu a kameng ti Iglesia ni Cristo (INC) ti nagummong iti Quirino Grandstand iti Manila iti panangrugi iti tallo nga aldaw a "Rally for Transparency and a Better Democracy" a nangrugi idi Domingo, Nobiembre 16, tapno ilungalongda ti transparensia, ken pannakadusa dagiti nagbasol nga opisial ti gobierno kalpasan ti pannakaibutaktak ti ginasut a naanomalia a flood control project iti entero a pagilian kadagiti naglabas a bulan.
Segun iti Manila Police District (MPD), agarup 314,000 a tattao ti naummong iti Quirino Grandstand, iti 4:00 iti malem.
Maysa pay a rali para iti isu met la panggep ti naangay iti People Power Monument iti EDSA nga insayangkat dagiti nadumaduma a grupo, a pattapattaen ti Quezon City Police District (QCPD) nga inatendaran ti nasurok a 1,000 a tattao, iti 4:00 iti malem (Nob. 16).
Rinibu met ti naummong iti University of the Philippines (UP) Diliman iti Quezon City para iti “Takbo Laban sa Korapsyon,” maysa a programa iti panagtaray kontra iti korapsion ken pannakadusa dagiti nagbasol iti kaso ti panagkunniber iti pagilian.
Mapukpukaw a nobia, nasarakan iti Pangasinan
Nangrugi daytoy iti 6:00 iti agsapa (Nob. 16) iti Oblation Plaza, nga indauluan ti UP Diliman Engineering Student Council, kaduada ti Kilusang Bayan Kontra Kurakot (KBKK).
Iti sabali a bangir, saan nga inkankano ti Malakanyang ti yik-ikkis ti dadduma a grupo nga aglusulos ni Presidente Marcos iti baet dagiti kaso ti panagkunniber kadagiti anomalia iti flood control project, ket impaganetgetda a dakkel ti posibilidad a maisardeng dagiti maisaysayangkat nga imbestigasion no mabaliwan ti administrasion.
Sinupiat ni Undersecretary ti Presidential Communications Office (PCO) Claire Castro ti pakdaar ti grupo ti United People’s Initiative (UPI) ken ni Marcos nga aglusulos daytoy no saan a mataming dagiti alegasion, ken kinunana a dagiti manggutgutigot iti panaglusulos ni Marcos ket isuda dagiti kangrunaan a maapektaran iti imbestigasion.
Inyebkas ti Armed Forces of the Philippines (AFP) ken dagiti tallo a kangrunaan a sangana - ti Philippine Army (PA), Philippine Navy (PN), ken Philippine Air Force (PAF) - ti nagkaykaysa nga apelarda para iti natalna, responsable a panangisayangkat, ken panagraem iti Konstitusion bayat a rinugian ti INC ti tallo nga aldaw a ralida iti Quirino Grandstand.
Inyunay-unay ni AFP Chief of Staff, Gen. Romeo Brawner Jr. nga agtalinaed ti militar a propesional, disiplinado, ken non-partisan nga institusion, saan nga agisin iti panagraemda iti Konstitusion, iti demokratiko a prinsipio nga insapatada a salakniban, ken kadagiti Filipino a pagserserbianda. (Aaron Recuenco/Manila Bulletin//Lito Hilidon/Bannawag)
