Inwaragawag ti Malakanyang ti panaglusulos da Executive Secretary Lucas Bersamin ken daulo ti Department of Budget and Management (BDM) Amenah Pangandaman iti bukodda a pagakman kalpasan a mairaman ti opisinada iti anomalia dagiti flood control project.
Iti maysa a press briefing idi Nobiembre 17, kinuna ni Undersecretary ti Presidential Communications Office (PCO) Claire Castro a naglusulos dagiti dua nga opisial gapu iti delicadeza, kalpasan a nadakamat ti idadauluanda nga ahensia a karaman iti naanomalia a flood control project a maim-imbestigaran ita, ken kas panangbigbigda iti karbengan ti administrasion a mangtaming iti daytoy banag.
Inlawlawag ni Castro a boluntario ti panaglusulos dagiti dua nga opisial, ket inawat a dagus daytoy ni Presidente Marcos.
Dinutokan ni Marcos ni Sekretario ti Department of Finance (DOF) Ralph Recto kas baro nga executive secretary, a sukat ni Bersamin; idinto a ni Frederick Go ti napusgan a baro a daulo ti DOF.
Senado, pinasingkedanna ti ₱6.793-trilion a nailian a badiet para 2026
Ni Undersecretary Rolando Toledo ti napusgan nga officer-in-charge (OIC) ti DBM a nangsukat ken ni Pangandaman.
Kinuna ni Castro a kayat ti presidente a boluntario nga aglusulos ti asino man a kameng ti gabinetena a mairaman iti anomalia dagiti flood control project. (Betheena Unite/Manila Bulletin//Lito Hilidon/Bannawag)
