Iti maikadua nga aldaw ti "anti-corruption rally" nga insayangkat ti Iglesia Ni Cristo (INC) idi rabii ti Lunes, Nobiembre 17, nagbitla ni Senador Imee Marcos ket imbutaktakna nga agus-usar iti droga ti kabsatna a ni Presidente Ferdinand Marcos Jr., ti asawana a ni Liza Araneta-Marcos, ken dagiti annakda.
Kinuna ni Sen. Marcos, a nalatak a kaaliado ni dati a presidente Rodrigo Duterte ken Bise Presidente Sara Duterte, nga uray idi sibibiag pay laeng ti amada, nagusaren ni Presidente Marcos Jr. iti droga ket saanen a nalapdan ti pannakailuodna.
Kinuna pay ni Sen. Marcos nga uray dagiti annak ti presidente ket agus-usar met iti droga, agraman ni Ilocos Norte 1st district Rep. Ferdinand Alexander "Sandro" Marcos..
Inawis ni Sen. Marcos ti kabsatna nga agawiden tapno maipan iti rehabilitation center.
Marcos, Robredo, nagsarak iti Naga city
"Urnosem 'ta bagim. Agpaagaska. Ikkatem ti droga iti bagim," kinuna ni Sen. Marcos.
Segun ken ni Sen. Marcos, ginundawayan dagiti managibubukod a tattao ti kasasaad ti kabsatna ken nagtakawda iti pondo ti gobierno.
Kinuna ni Sen. Marcos a ti pannakailuod ti kabsatna iti droga ti makaigapu iti panagwaras ti panagkunniber, nangruna kadagiti flood control project, a mismo a ti presidente ti nangibutaktak. (Hannah L. Torregoza/Manila Bulletin//Lito Hilidon/Bannawag)
