Lineppas ti Iglesia Ni Cristo (INC) ti inangayda a rali iti Quirino Grandstand kontra iti panagkunniber itay Lunes, Nobiembre 17, nasaksakbay ngem iti inkeddengda a tallo nga aldaw.
Agpaut koma ti rali manipud Nobiembre 16 agingga iti 18.
Segun iti panakangiwat ti INC a ni Ka Edwil Zabala, lineppasdan ti rali ta nabannogen dagiti miembroda, ket natungpalen ti panggep ti rali.
"Saan a kasapulan ti tallo nga aldaw tapno matungpal ti panggep ti rali a mangyebkas iti mensahe iti panangyawagmi it hustisia, transparensia, kappia, ken pannakadusa dagiti nakabasol," kinuna ni Zabala.
Retirado a heneral, nakemmeg gapu iti panangsugsog a mangtippuog iti gobierno
Impaganetget dagiti daulo ti INC a tarigagay ti rali ti panagkiddawda iti natibker nga aksion ti gobierno kontra iti panagkunniber, saan a tapno tippuogenda ti agdama nga administrasion.
Pinasingkedan met ni INC General Evangelist Bienvenido Santiago Jr. daytoy a panggep ti ralida.
Segun iti Manila Police District (MPD), mapan iti agarup 550,000 a tao ti dimmar-ay iti rabii ti maikadua nga aldaw ti rali.
Iti sabali a bangir, kinuna dagiti sumagmamano a kameng ti INC a saan a pudno dagiti maikomkomento iti social media a naikkanda iti ₱3,000 tapno dumar-ayda iti rali. (Hannah Nicol/Manila Bulletin//Lito Hilidon/Bannawag)
