Patien dagiti kameng ti minority bloc ti Kamara nga awan ti nadagsen a rason a ma-impeach ni Presidente Marcos Jr., ken saan nga agballigi no adda man maipila a kaso ti impeachment kontra kenkuana.
Daytoy ti kapanunotan da Akbayan Party-list Rep. Perci Cendaña ken Kamanggagawa Party-list Rep. Eli San Fernando iti press conference ita nga aldaw, Nobiembre 19, iti baet ti sayangguseng a dagiti alegasion ti panagkunniber kontra ken ni Marcos -- kangrunaan ti inwaragawag ni dati nga Ako-Bicol Party-list Rep. Zaldy Co -- ket mabalin nga agtungpal iti kaso nga impeachment.
Iti napalabas a Kongreso, nangipila ti Akbayan iti impeachment complaint kontra ken ni Bise Presidente Sara Duterte, gapu ta adda natibker ken nadagsen nga ebidensiada.
Segun ken ni Cendaña, no pudno nga agtalek ni Co iti iggemna nga ebidensia, masapul nga iruarna daytoy ken agawid iti pagilian, ta surotenda ti sadino man a pagturongan dagiti ebidensia.
Senado, pinasingkedanna ti ₱6.793-trilion a nailian a badiet para 2026
Ngem agingga a saan a maaramid dagitoy, kinuna ni Cendaña nga awan ti nadagsen a rason a maipila ti impeachment complaint, ta masapul a naibasar daytoy iti kinapudno ken ebidensia.
Maipalagip nga uppat nga impeachment complaint a maibusor ken ni Bise Presidente Duterte ti inyendorso ni Cendaña iti maika-19 a Kongreso. (Ellson Quismorio/Manila Bulletin//Lito Hilidon/Bannawag)
