Ilunglungalong da Camarines Sur 5th district Rep. Migz Villafuerte ken 2nd district Rep. Luigi Villafuerte ti pannakaipasdek ti National Film Archive of the Philippines (NFAP).
Kas nailanad iti House Bill (HB) No.5053, ti NFAP ti mangidaulo iti pannakataginayon, panangitandudo, ken panangpalatak iti pelikula a Filipino a -- kas paset ti kannawidan ti pagilian ken artistiko a gameng -- rumbeng a salakniban ken taginayonen ti Estado.
Maibatay iti HB No.5053, ti Film Development Council of the Philippines (FDCP) ti mangimaton iti NFAP, a maysa nga ahensia iti sidong ti Office of the President (OP) a mangipatungpal kadagiti polisia ken programa a mangitandudo iti panangpartuat iti napipintas a pelikula.
Segun kadagiti Villafuerte ken dagiti kaduada a nangisurat iti gakat a linteg, masapul a maidulin dagiti pelikula a Filipino iti maysa a permanente ken umisu a pasdek tapno mailebben sadiay, ta dagitoy a pelikula ti pakabuklan ti kultural a gameng ti pagilian ken salakniban met ti Estado.
Holiday truce nga indiaya ti CPP, saan nga inawat ti AFP, DND
Maibasar iti gakat a linteg, masapul a mangisubmiter dagiti kompania ken tattao a prodiuser ti pelikula, nga addaan nainkalintegan a presiona, iti kopia ti pelikulada iti National Film Archive iti las-ud ti tallo a bulan kalpasan ti opisial nga iruruar ti pelikulada.
Idi 2024, adda indulin ti Philippine Film Archive a 56,000 a pelikula a pakabuklan ti film manipud 35 millimeters, 16 millimeters, 8 millimeters, ken tape iti nadumaduma a format kas iti VHS, Betacam, U-matic, ken mini DV. Nairaman ditoy ti 47 a pelikula a partuat dagiti Philippine National Artist.
Napusgan ti NFAP a mangipaay iti pelikula para iti edukasion, historikal, wenno kultural a panggep kadagiti amin a paset ti kagimongan ti Filipinas, agraman ti internasional a komunidad.
Ti NFAP ti mangipaay iti teknikal a tulong kadagiti opisina ti gobierno, sanga, ahensia, nailian wenno lokal, iti panagplano, panangipatungpal, ken panangtingiting kadagiti iduldulinda a pelikula. (Ellson Quismorio/Manila Bulletin//Lito Hilidon/Bannawag)
