Ni VILLAMOR VISAYA JR.
Pimmusay ni Peter La. Julian, mannurat ti Bannawag ken sigud a koresponsal ti aginaldaw a warnakan, iti tawenna a 87 idi iti 11:46 ti aldaw ti Nobiembre 17, 2025 iti balayda iti Oscariz, Ramon, Isabela, kas impakaammo dagiti kabagianna.
Naulilana ti asawana a ni Estelita ken dagiti pito nga annakda. Naimassayag ti bangkayna iti pagtaenganda iti Oscariz.
Nagsagaba ni La Julian, retirado nga empleado ti Philippine Information Agency, iti komplikasion ti dalem ken gapu iti tumor.
ALLON TI BIAG: Walo a Dekada a Panagdaliasat (Maudi a Paset) 2
Nagpaay pay nga information head ti Department of Information iti Ilocos Sur ken Siudad ti Baguio.
Malaksid iti panagbalinna a periodista, nagsursurat iti nadumaduma nga Ilokano ken Ingles a nobela a kas iti "Casa Fernandez" malaksid pay kadagiti adu a sarita, salaysay, ken daniw nga insuratna para iti Bannawag, Pangasaan, Aranaar, Rimat, Depthnews, Philippine Daily Inquirer, Philippine News and Features, ken dadduma pay.
Kameng ni La Jullian iti ekumenikal a grupo a nangipatarus Ilokano iti impablaak ti Philippine Bible Society a Biblia, manipud iti orihinal a Hebreo ken Griego a bersion.
Naipasngay idi 1938 iti Laaog, Ilocos Norte, nagadal iti nadumaduma nga eskuela, a pakairamanan ti University of the Philippines a nangalaanna iti journalism.
Nabayag a nagnaed iti California, Estados Unidos ti Amerika kalpasan ti panagretirona iti gobierno a kaduana ti asawana ken ti maysa nga anakna a lalaki.
Nangipeksa dagiti kakaduana a mannurat iti pannakisimpatia iti kellaat nga ipupusayna.
Kinuna ni Arthur Urata Sr., dati a presidente ti Gunglo Dagiti Mannurat nga Ilokano iti Filipinas (GUMIL Filipinas) ken maysa a mannurat a Cagayano, a mailiw iti "nainkabsatan a panaggayyemda" ken La Julian nangruna no kombension dagiti mannurat.
"Agnanayon nga agtalinaed dagiti imbinglaymo a sirib," kinunana.
Kinuna met ni Lianne Rarangol, apoko ni La Julian, nga agladladingit iti "ipupusay ti naimbag ken naalumamay a kararua" ti lolona. "Agnanayon a maikitikit iti pusok dagiti pannursuro ken siribmo. Sapay koma ta makasarakka iti agnanayon a talna kadagiti imana (Namarsua), Lolo Peter," innayonna.
Impaganetget met ni Julio Belmes, maysa nga arkitekto ken mannurat, a maysa nga icon ni La Julian iti daniw nga lokano malaksid iti kinasiglatna a kas journalist.
