Agkiddaw ti Office of the Ombudsman (OMB) iti International Criminal Police Organization (Interpol) iti pannakaipaulog ti red notice tapno sapulen ken arestarenda ni dati a kongresman Zaldy Co a naidarum iti kaso a kriminal iti Sandiganbayan gapu iti anomalia iti ₱289.5 a milion ti balorna a flood control project iti Naujan, Oriental Mindoro.
Pimmanaw ni Co iti Filipinas idi Hulio gapu iti maipagarup a medical checkup ngem saan pay a nagsubli sipud idi.
Ti red notice ti Interpol ket maysa a kiddaw kadagiti mangipatpatungpal iti international law tapno sapulen ken kemmegenda dagiti "wanted" a tattao ken maisublida iti agkidkiddaw a pagilian.
Babaen ti red notice, mabalinda a sapulen, kemmegen, isubli iti pagilian wenno ipakat ti ekstradision.
Marcos, Robredo, nagsarak iti Naga city
Naidarum ni Co, agraman dagiti direktor ti kompaniana a Sunwest Corporation, ken dadduma nga opisial ti DPWH Region IV-B, iti kaso a graft ken malversation of public funds.
Awan ti nairekomendar a piansa iti kasoda nga impila ti OMB idi Nobiembre 18.
Segun ken ni Assistant Ombudsman Jose Dominic "Mico" F. Clavano, apaman a maipaulog ti warrant of arrest, mabalinen a kiddawen ti OMB ti pannakawaswas ti pasaporte ni Co tapno makedngan laengen ti panaggaraw ni Co iti ballasiw-taaw.
Apaman a mayawat ni Co iti gobierno ti Filipinas, maiditene daytoy iti Bureau of Jail Management and Penology (BJMP) bayat ti panagtulid ti kasona, ket no matakatuan a nagbasol, maibalud iti pasilidad ti Bureau of Corrections (BuCor) nga imatmatonan ti Department of Justice (DOJ). (Czarina Nicole Ong Ki/Manila Bulletin//Lito Hilidon/Bannawag)
