Pinakdaaran ti National Unity Party (NUP) ti Independent Commission for Infrastructure (ICI) iti panangbusbosda iti tiempo ken pigsada a mangimbestigar iti saan a napatalgedan nga alegasion ti maysa a tao a maim-imbestigar met gapu iti panagkunniber.
Daytoy ti kinuna ti NUP -- babaen ti secretary-general Reginald Velasco -- ita nga aldaw, Nobiembre 19, nga agul-ulbod ni dati nga Ako Bicol Party-list Rep. Zaldy Co iti panangiramanna ken ni Presidente Marcos Jr. ken dadduma pay nga opisialna, iti kaso ti panagkunniber.
Iti kallabes, nagsao ni Co, dati a daulo ti Committee on Appropriations ti Kamara, babaen ti paskilna a video iti Facebook, ket imbagana a ni Marcos ti nangipilit a maisingit iti 2025 national budget ti ₱100 a bilion ti balorna a proyekto, partikular iti Bicameral Conference Committee hearings.
Kuna ni Co a manipud iti daytoy a panangisingit iti pondo, nakaala ti pesidente iti 25 a porsiento wenno ₱25 a bilion a kickbak.
Pannakakombiktar ti tallo a polis a nangpapatay ken ni Kian delos Santos, pinatalgedan ti Korte Suprema
Segun iti NUP, no agpayso dagiti alegasion ni Co, nadagsen a krimen daytoy. Ngem agpannurayda laeng iti sao ni Co a saanna a sinapataan, awan makapaneknek, ken inaramidna bayat nga adda iti sabali a pagilian ken saan a mausig.
Gapuna, kiniddawda iti ICI nga agridamda iti panagimbestigarda ken iti panangiturongda iti pigsa ken rekursosda kadagiti testimonia a nasukimat, napadas, wenno nausig, a saan ketdi a kadagiti testimonia a saan a pinasingkedan ti mapagtalkan ken mapatalgedan nga ebidensia.
Innayon ni Velasco a no agpayso dagiti imbaga ni Co, rumbengna a saan koma a bumdeng daytoy a mangiparang kadagiti imbutaktakna iti autoridad ti Filipinas. (Ellson Quismorio/Manila Bulletin//Lito Hilidon/Bannawag)
