Impila ti Office of the Ombudsman (OMB) ti kaso a graft ken malversation of public funds iti Sandiganbayan idi Martes, Nobiembre 18, kontra ken ni dati nga Ako Bicol party-list Rep. Zaldy Co ken dagiti opisial ti Department of Public Works and Highways (DPWH) iti Region IV-B. Nairaman pay iti kaso dagiti direktor ti Sunwest Corporation nga idadauluan ni Co.
Dagitoy ti umuna a kaso nga indatag ti OMB iti Sandiganbayan kontra kadagiti opisial ti DPWH ken pribado a contractor sipud rinugian ti gobierno ti imbestigasion kadagiti minilion a pisos ti balorna nga anomalia kadagiti flood control project, dua a bulanen ti napalabas.
Awan ti nairekomendar a piansa kadagiti kaso nga indatag ti OMB kadagiti flood control project iti Naujan, Oriental Mindoro.
Kadua ni Co a naidarum dagiti opisial ti DPWH iti Region IV-B a da Regional Director Gerald A. Pacanan III, Assistant Regional Director Gene Ryan A. Altea, Assistant Regional Director Ruben C. Santos Jr., Project Engineer III Felisardo S. Casuno, Materials Engineer Timojen A. Sacar, Quality Assurance and Hydrology Division OIC-Chief ken Accountant IV Lerma D. Cayco, Planning and Design Division OIC-Chief Montrexis T. Tamayo, ken Maintenance Division Chief Juliet C. Calvo.
Mapukpukaw a nobia, nasarakan iti Pangasinan
Naidarum met dagiti kameng ti board of directors ti Sunwest Corporation nga idadauluan ni Co.
Segun ken ni Assistant Ombudsman Jose Dominic F. Clavano, naidarum dagiti opisial iti kaso a malversation of public funds (nga agbalor iti ₱289.5 a milion), babaen ti falsification of public documents kas sagudayen ti Article 217 kas mainaig iti Article 171(4) ti Revised Penal Code (RPC), ken panaglabsing iti Section 3(e) ti Republic Act (RA) No. 3019 wenno ti Anti-Graft and Corrupt Practices Act.
Naidarum pay ni Co iti panaglabsing iti Section 3(h) ti RA 3019 gapu iti mapapati a panangawatna iti saan a maiparbeng a pinansial a pabor wenno benepisio.
Kinuna ni Clavano a daytoy ti umuna a kaso nga indatag kadakuada ti ICI (Independent Commission for Infrastructure), ket isu ti umuna a kaso a maidatag iti korte. (Jeffrey Damicog/Manila Bulletin//Lito Hilidon/Bannawag)
