Naduktalan a nagbasol ni naikkat a mayor ti Bamban, Tarlac Alice Guo ken tallo a kakaduana, ita a Huebes, Nobiembre 20, iti Pasig Regional Trial Court (RTC) Branch 167 iti qualified human trafficking a nainaig iti illegal a Philippine Offshore Gaming Operation (POGO) iti Tarlac, ket nasentensiaanda a mabalud iti tungpal biag (reclusion perpetua).
Nakombiktaran pay da Rachelle Malonzo Carreon, Jaimielyn Cruz, ken Walter Wong Rong gapu iti panangorganisarda iti trafficking operations iti uneg ti Baofoc compound iti Bamban. Naibilin pay nga agmulta dagitoy iti ₱2 million.
Nagtaud ti kaso kontra ken ni Guo iti reklamo nga impila ti Philippine National Police (PNP) ken Presidential Anti-Organized Crime Commission (PAOCC) kalpasan ti panangraut idi napan a tawen iti POGO nga ipatpataray ti Zun Yuan Technology.
Dati a presidente Duterte, 'fit to participate' iti ICC, segun kadagiti medical expert
Maisuko met pabor iti gobierno ti kompania ti Baofu, ti lugar ti naraut nga scam hub iti Bamban..
Immunan nga inikkat ti Office of the Ombudsman ni Gou a kas mayor gapu iti grave misconduct gapu iti pannakainaigna iti ipatpataray dagiti Intsik nga online gambling center iti Bamban, a nakaduktalan a yan ti ginasut a tattao a mapapati a napuersa a mangiwayat iti scam ta napangtaanda iti pannakaparparigat no dida agtungpal.
Indarum idi ti Department of Justice (DOJ) ni Guo iti babaen ti Expanded Anti-Trafficking in Persons Act of 2022.
Iti pannakasentensiana, mayakar ni Guo, a nakabalud iti agdama iti Pasig City Jail Dormitory, iti Correctional Institution for Women iti Siudad ti Mandaluyong. Maipasidong met iti kustodia ti Bureau of Corrections dagiti kakaduana a nasentensiaan. (Richielyn Canlas/MANILA BULLETIN)
