Inarestar dagiti kameng ti National Bureau of Investigation-International Airport Investigation Division (NBI-IAID) ti maysa a lalaki iti Ninoy Aquino International Airport (NAIA) idi Nobiembre 9, gapu iti maipagarup a nasaknap nga illegal recruitment ken qualified trafficking dagiti innem a Filipino.
Segun iti NBI ita nga aldaw, Nobiembre 20, saanda nga impablaak ti pakabigbigan ti inarestarda a lalaki a kadua ti innem a tattao a mapan koma iti Vietnam.
Bayat ti naaramid a departure formalities, natakuatan ti pudno a panggep ti panagbiaheda, a mapanda agtrabaho iti Cambodia kas "Chat Support’ wenno ‘Customer Service Representatives.’
Natakuatan pay dagiti imbestigador a nag-recruit ti lalaki iti innem a Filipino nga agtrabaho iti abroad ket agsueldoda iti $500 agingga $800 binulan.
Mapukpukaw a nobia, nasarakan iti Pangasinan
Segun iti NBI, pinatalgedan ti Department of Migrant Workers (DMW) nga awan ti lisensia wenno pammalubos ti lalaki nga ag-recruit kadagiti mapan agtrabaho iti ballasiw taaw.
Naidarum ti lalaki iti kaso a large-scale illegal recruitment maibasar iti Republic Act (RA) No. 8042, iti Migrant Workers and Overseas Filipinos Act of 1995 kas naamendaran, ken qualified trafficking in persons committed in large scale, segun iti naamendaran a RA No. 9208. (Jeffrey Damicog/Manila Bulletin//Lito Hilidon/Bannawag)
