Binabalaw ni Davao City first district Rep. Paolo Duterte ti komento ni dati a Philippine National Police chief Gen. Nicolas Torre III mainaig iti umadani a pannakaarestar ni Sen. Ronald dela Rosa gapu iti kasona iti International Criminal Court (ICC).
Iti paskil ni Duterte iti Facebook idi Nobiembre 19, kinunana nga awan ti kredibilidad ni Torre a mangipangta wenno agkomentar iti maipapan kadagiti internasional a linteg.
"Sakbay nga agarapaap iti pannakaarestar ti asino man, masapul a tiliwenna pay ti kinamanaglilipat dagiti Filipino, ta awan ti makalagip a nagbalin isuna a hepe ti PNP," kinuna ni Duterte.
Kinuestionar ni Duterte ti panagkomentar ni Torre mainaig iti internasional a linteg, idinto a saanen a paset ti Filipinas ti ICC.
Senado, pinasingkedanna ti ₱6.793-trilion a nailian a badiet para 2026
Indagadag ni Duterte ken ni Torre a saan koman nga agkomkomentar iti awan kaes-eskanna.
Binabalaw met ni Duterte ni DILG Secretary Jonvic Remulla gapu iti panangipagarupna nga agtungpal iti "inciting to sedition" dagiti rali ken panangbabalaw ti publiko.
"Amangan no nakaro laeng ti kinaarsagidyo no kasta nga adda mangbabalaw kadakayo," innayon ni Duterte. (Ivy Tejano/Manila Bulletin//Lito Hilidon/Bannawag)
