Inallukoy ni Senator Paolo “Bam” Aquino IV ita nga aldaw, Nobiembre 20, ni dati a kongresman Zaldy Co nga agsublin iti Filipinas tapno pormal a sapataanna dagiti alegasionna kontra ken ni Presidente Marcos Jr.
Segun ken ni Aquino, rumbeng nga ibutaktak ni Co amin nga ammona mainaig iti naanomalia a flood control project ken budget insertion, ta isuna idi ti daulo ti Committee on Appropriations ti Kamara.
"Ulitek dagiti idagdagadag ti simbaan ken nadumaduma a grupo nga agawid koman ni Co," kuna ni Aquino.
Saan pay a nakasubli iti Filipinas ni Co, a nagipaskil iti video iti social media a nangipalgak nga immawat iti kickback da Presidente Marcos Jr. ken dati a House Speaker Martin Romualdez manipud iti maipagarup nga insingitda a ₱100 a bilion iti 2025 national budget, tapno pormal nga agtestimonia koma iti Independent Commission on Infrastructure (ICI) ken iti Senate Blue Ribbon Committee, mainaig iti naanomalia a flood control project ken ti kontrobersial 2025 national budget.
Kasapulan ti natibker ken nainkalintegan a pagtaktakderan iti parikut iti WPS --NMC
Kinuna ni Aquino a rumbeng a madusa dagiti amin a nairaman iti naanomalia a flood control project, ken masapul a maisubli iti gobierno ti amin a nakunniber a kuarta. (Hannah L. Torregoza/Manila Bulletin//Lito Hilidon/Bannawag)
