Yawaten ti Independent Commission for Infrastructure (ICI) ken ti Department of Public Works and Highways (DPWH) dagiti ebidensia a nakalapda iti Office of the Ombudsman (OMB), mainaig iti mapapati a naanomalia a flood control projects.
Daytoy ti impalgak ni Presidente Marcos Jr. ita nga aldaw, Nobiembre 21, babaen ti video a naipaskil iti social media account-na.
"Kayatko nga ipakaammo kadagiti kailiantayo nga amin nga impormasion a naala ti ICI ken DPWH ket maited iti Ombudsman tapno maimbestigarda," kinuna ni Marcos.
Segun iti presidente, mairaman kadagiti maited iti OMB ti impormasion maipanggep kada dati a House Speaker Martin Romualdez ken dati a kongresman Zaldy Co.
Senado, pinasingkedanna ti ₱6.793-trilion a nailian a badiet para 2026
Segun ken ni Marcos, apaman a maawat ti Ombudsman dagiti dokumento, mabalinen nga ipila dagiti prosecutor ti kaso a “plunder, anti-graft, wenno indirect bribery.”
Inyunay-unay ni Marcos nga ilaksid ti administrasion ti politika isu a dagiti agwaywayas a constitutional body ti mangimbestigar kadagitoy.
Impasigurado ni Marcos iti publiko a saan nga agleppas ti kampania ti administrasionna iti panangibutaktak laeng iti nagan dagiti nairaman iti panagkunniber, no di ket idarumda dagiti nairaman iti panagkunniber tapno madusa wenno maibalud dagitoy, ket awan ti makalisi iti panagimbestigarda. (Argyll Cyrus Geducos/Manila Bulletin//Lito Hilidon/Bannawag)
