Impalgak ti grupo a United People’s Initiative (UPI) a saan a pudno dagiti alegasion ti Armed Forces of the Philippines (AFP) ita nga aldaw, Nobiembre 21, a pinonduan dagiti ganggannaet ti inangayda a rali iti EDSA People Power Monument.
Itay kallabes, kinuna ti AFP a dagiti rali, a dinar-ayan pay dagiti retiradon iti miilitar, ket mabalin a pinonduan dagiti ganggannaet.
Segun ken ni acting AFP spokesperson Rear Admiral Roy Vincent Trinidad idi Nobiembre 18, nadlawna ti saan a gagangay a sistema ti suporta iti naangay a rali.
Kuna ni Trinidad a kitkitaenda amin a posible a pagturongan ti imbestigasionda, nangruna no maipapan iti panangpondo, no umili met laeng dagitoy wenno ganggannaet a grupo.
DOH, namakdaar iti posible a pannakadangran iti Traslacion
Ngem insungbat ti UPI, saan a pudno ti panangipapan ti AFP, ket kinunana nga adda agtarigagay a mangdadael iti grupo kalpasan ti natalna a panagralida iti EDSA People Power Monument itay napan a lawas.
Inlawlawag ti UPI a saan a pinonduan dagiti ganggannaet dagiti ralida, ta dagiti ginastoda ket naggapu kadagiti lokal a mangsupsuportar kadakuada, volunteers, ken ordinario a Filipino a mamati iti hustisia, panangdusa kadagiti nagbasol, ken pudpudno a reporma, ket kaaduan kadagitoy ket "in-kind," ti intedda a donasion, saan a kuarta.
Kinarit ti UPI ti AFP a mangiruar iti ebidensia kadagiti ibagbagada a panangpondo dagiti ganggannaet a grupo iti ralida. (Allysa Nievera/Manila Bulletin//Lito Hilidon/Bannawag)
