Nakasaganan ti Correctional Institution for Women (CIW) iti Siudad ti Mandaluyong a mangpasangbay ken ni dati a mayor ti Bamban, Tarlac Alice L. Guo a nasentensiaan iti tungpal-biag a pannakaibalud gapu iti kasona a qualified human trafficking.
Segun ken ni BuCor Director General Gregorio Pio P. Catapang Jr., ing-ingetandan ti panangbantayda iti seguridad iti CIW a pakayakaran ni Guo kalpasan nga impaulog ti Pasig City Regional Trial Court (RTC) Branch 167 ti pangngeddengna idi Nobiembre 20.
Nasentensiaan met da Rachelle Malonzo Carreon, Jaimielyn Cruz, ken Walter Wong Rong gapu iti pannakairamanda iti operasion ti human trafficking iti maiparit a Philippine Offshore Gaming Operator (POGO) iti Bamban.
Segun ken CIW Corrections Technical Superintendent Marjorie Ann Sanidad, insaaddan dagiti kanayonan a Corrections Emergency Response Team tapno masigurado ti kappia ken urnos iti uneg ti pasilidad.
Pannakakombiktar ti tallo a polis a nangpapatay ken ni Kian delos Santos, pinatalgedan ti Korte Suprema
Kas maitunos iti proseso, ti Reception and Diagnostic Center (RDC) ti CIW ti mangawat ken ni Guo ken mangpatalged kadagiti dokumento ken gargaretna.
Lima nga aldaw a maipasidong ni Guo iti quarantine iti RDC ken agdalan iti naan-anay a panangeksamen ti doktor. Kalpasanna, mayakar ni Guo iti gagangay a dormitorio ti RDC iti las-ud ti 55 nga aldaw ken agdalan iti orientasion, pannakaeksamen ken kualipikasion.
Kalpasan ti 60 nga aldaw ni Guo iti RDC, mayakar daytoy iti naituding a regular a dormitorio iti Maximum-Security Camp gapu ta tungpal-biag ti naipataw a dusana. (Jeffrey Damicog/Manila Bulletin//Lito Hilidon/Bannawag)
