Impila ni Senadora Risa Hontiveros ti singasing a linteg a mangiparit iti political dynasty, ta masapul a maaddaan ti padapada a gundaway ti isu amin nga agbalin nga opisial ti gobierno.
Dinakamat ni Hontiveros ti Article II, Section 26 ti 1987 Constitution, a nangideklarar a:"siguraduen ti Estado ti pannakaipaay ti patas a gundaway ti asino man nga agtarigagay nga agserbi iti publiko, ken maiparit ti political dynasty kas inkeddeng ti linteg."
No agbalin a linteg, ti Senate Bill (SB) NO. 1548 ket managanan iti "Kontra Dinastiya Act."
Segun iti SB 1548, maiparit nga agkandidato wenno agakem iti nailian a pagsaadan dagiti kabagian ti agdama nga opisial iti nailian a saad, agingga iti fourth degree of consanguinity wenno affinity.
Marcos, Robredo, nagsarak iti Naga city
Maibasar pay iti SB 1548, maparitan dagiti kabagian ti agdama (wenno nakatugaw) nga opisial (agingga iti fourth degree of consanguinity wenno affinity) nga agkandidato wenno agakem iti ania man a saad iti isu met laeng a legislative district, probinsia, wenno siudad.
Kastoy met iti party-list system.
Dagiti aglabsing, agraman ti misrepresentation wenno saan a panangideklarar iti kinapudno iti certificate of candidacy (COC) kas imbilin ti Section 5 ken Section 6, ket maibilang nga election offense ket madusa kas mayannurot iti probision ti Omnibus Election Code. (Dhel Nazario/Manila Bulletin//Lito Hilidon/Bannawag)
