Imbilin ti Sandiganbayan ita nga aldaw, Nobiembre 21, ti pannakaarestar ni dati a kongresman Zaldy Co ken ti 17 pay nga opisial ti Department of Public Works and Highways (DPWH) ken direktor ti Sunwest Corporation a naidarum iti kaso a graft ken malversation of public funds iti flood control project iti Naujan, Oriental Mindoro.
Iti maysa a press statement, kiniddaw ti Office of the Ombudsman (OMB) kadagiti pannakabagi ti linteg a kemmegendan ni Co ken dagiti dadduma pay a naidarum.
Saan a nadakamat no ania a dibision ti Sandiganbayan ti nangipaulog iti warrant of arrest. Na-raffle dagiti tallo a kaso nga impila ti OMB idi Nobiembre 18 iti 5th, 6th, ken 7th division ti Sandiganbayan.
Malaksid ken ni Co, nairaman iti warrant of arrest da DPWH Region IV-B Director Gerald A. Pacanan, Assistant Regional Director Gene Ryan A. Altea, Assistant Regional Director Ruben C. Santos, Jr., Construction Division Chief Dominic G. Serrano, Project Engineer III Felisardo S. Casuno, Materials Engineer Timojen A. Sacar, Planning and Design Division OIC-Chief Montrexis T. Tamayo, Maintenance Division Chief Juliet C. Calvo, Quality Assurance and Hydrology Division OIC-Chief Dennis P. Abagon, Accountant IV Lerma D. Cayco, bids and awards committee member Grace D. Lopez, BAC vice chairperson Friedrich Karl L. Camero, President and Chairperson ti Sunwest Board of Directors Aderma Angelie D. Alcazar, Treasurer Cesar X. Buenaventura, dagiti kameng a da Consuelo D. Aldon, Engr. Noel Y. Cao, ken Anthony L. Ngo.
Mapukpukaw a nobia, nasarakan iti Pangasinan
Gapu iti nairuar a warrant of arrest, mabalinen a kiddawen ti OMB iti International Criminal Police Organization (Interpol) ti pannakaipaulog ti red notice a mangkiddaw kadagiti pannakabagi ti internasional a linteg nga arestarenda ni Co a pimmanaw iti Filipinas idi Hulio ken saanen a nagsubli sipud idi.
Mabalin metten a kiddawen ti Ombudsman iti Sandiganbayan ti pannakakanselar ti pasaporte ni Co tapno malapdan ti panagbiahena iti nadumaduma a pagilian. (Czarina Nicole Ong Ki/Manila Bulletin//Lito Hilidon/Bannawag)
