Impalgak ni Nicholas Kaufman, abogado ni dati a presidente Rodrigo Duterte, a saan a pudno a nasarakan nga awanan puot ni Duterte iti uneg ti siledna iti detention facility ti International Criminal Court (ICC) iti The Hague, Netherlands.
Itay nabiit, nagwaras iti maysa a di napatalgedan a Facebook page, ken iti social media, a naawanan iti puot ni Duterte iti siledna.
Iti statement ni Kaufman a naipaskil iti Facebook page ti Duterte vlogger a ni Alvin & Tourism, kinuna ni Kaufman a saan nga agpayso ti impormasion a nagwaras iti internet a nasarakan a naawanan iti puot ni dati a presidente Duterte iti uneg ti siledna iti dayta nga agsapa.
Segun ken ni Kaufman, nakasaritana ni Duterte ket sitatalna daytoy nga agur-uray iti pangngeddeng ti Appeals Chamber ti ICC mainaig iti interim release daytoy.
Senado, pinasingkedanna ti ₱6.793-trilion a nailian a badiet para 2026
Nupay kasta, sipapardas a nagkomento dagiti Filipino iti The Hague a pasurot ni Duterte, nga awan naawatda a kastoy a report, idinto a masansan nga agtitiponda iti ruar ti Scheveningen Prison iti The Hague, Netherlands a mangipukpukkaw iti pannakawayawaya ni Duterte.
Ti Appeals Chamber ti ICC ti maudi a mangikeddeng kadagiti desision ti Pre-trial Chamber, ket naituding a mangisayangkat iti hearing para iti pangngeddengda inton Nobiembre 28 mainaig iti apelar ti depensa a mangbalusingsing iti desision ti Pre-Trial Chamber I a saan nga immanamong iti kiddaw nga interim release ni Duterte. (Raymund Antonio/Manila Bulletin//Lito Hilidon/Bannawag)
