Inallukoy ni Senador Francis “Kiko” Pangilinan dagit mammanday-linteg a maaprobaran koma a dagus ti Senate Bill (SB) No. 1547 wenno ti gakat a pannakabukel ti Justice Reform Commission (JRC), tapno mataming ti nasaknap a panagkunniber iti pagilian.
Kinuna ni Pangilinan a no maanamongan ti SB 1547, makatulong daytoy a mangsebseb iti kumarkaro a pungtot ti publiko kadagiti naanomalia a flood control project, a nangibutaktak iti agbalin nga epekto ti panangtakaw iti pondo ti gobierno, ken ti saan a panagballigi ti sistema ti panagturay, iti napeggad a panaglayus, pannakadadael dagiti pagtaengan, ken pannakapukaw dagiti pagbiagan.
"Mawaw unayen dagiti umili iti hustisia. Kayatda a madusa dagiti nakabasol, saan a siwawaya ken mangtagtagiragsak kadagiti kinunniberda," kinuna ni Pangilinan.
Imballaag pay ni Pangilinan, a daulo ti Senate Committee on Justice and Human Rights, a ti panagtalinaed ti nakaro a panagkunniber ken ti kaawan ti madusa a nagbasol, ti mangpaneknek iti kinaawan ti hustisia para kadagiti gagangay nga umili, ngem nasayaat para kadagiti nabileg a tattao.
Marcos, Robredo, nagsarak iti Naga city
Kinuna ni Pangilinan a masapul a masukimat no apay ta saan a naballigi ti sistema ti hustisia iti pagilian, no apay a siwawaya latta dagit nagbasol, no apay a nakaro ti pannakaitantan dagiti kaso, ken no apay a nagsaknap ti panagkunniber.
Segun ken ni Pangilinan, masapul a matarimaan ti sistema ti hustisia kas maysa a pagilian, ta no saan, ad-adda a madadael daytoy.
Maibasar iti SB 1547, ti JRC ti agimbestigar kadagiti lima nga adigi ti sistema ti hustisa: panangipatungpal iti linteg, prosekusion, ti hudikatura, ti correctional system, ken ti komunidad.
Segun iti SB 1547, maikkan ti bileg ti JRC a mangtingiting kadagiti depektibo a proseso, mangsukimat kadagiti makatubeng iti hustisia kadagiti nakapuy a sektor, ken mangirekomendar iti napardas ken maipatungpal a reporma. (Hannah L. Torregoza/Manila Bulletin//Lito Hilidon/Bannawag)
