Inwaragawag ti Alex Vicente Yadao (ALVIYA) Literary Foundation a naluktanen ti Pasalip ALVIYA iti Sarita 2026. Naipakaammo daytoy babaen ti Secretariat iti Tungtongan 2025 ti GUMIL Filipinas iti Vigan City idi Nobiembre 2025, bayat ti pannakayawat dagiti gunggona dagiti nangabak iti Pasalip ALVIYA iti Sarita 2025. Mainaig kadaytoy a pakaammo, agawaten ti contest secretariat kadagiti maisalip a sarita para iti Maika-14 a Pasalip ALVIYA iti Sarita (2026).
Daytoy a pasalip ket maysa kadagiti proyekto para iti Literatura nga Ilokano ni Alex V. Yadao, maysa a Patron ti Literatura nga Ilokano a tubo ti Libertad, Abulug, Cagayan ngem agnanaeden iti Siudad ti New York iti Estados Unidos. Tarawidwidan met daytoy ti project director-consultant a ni Dr. Freddie Pa. Masuli, tubo met laeng ti Libertad, Abulug, Cagayan ken agdama a mannursuro iti Cagayan State University, Sanchez Mira, Cagayan ken maysa kadagiti agdama nga opisial ti GUMIL Filipinas.
Dagitoy dagiti pagalagadan ti salip:
1. Silulukat ti salip kadagiti amin a mannurat nga Ilokano, propesional man wenno agdadamo, ken uray pay kadagiti saan nga Ilokano ngem makasurat iti pagsasao nga Ilokano.
Para Kadagiti Agdadamo a Mannurat: Maika-2 a Salip iti Sarita ti Norberto D. Bumanglag Jr. Literary Awards
2. Nawaya ti makisalip a mangpili iti ania man a tema a kayatna a suraten.
3. Agatiddog ti pakisalip iti 12-20 a panid iti short bond paper (8.5 x 11 inches, letter size), nai-computer (agusar iti Times New Roman, Font Size 12) iti doble espasio ken addaan maysa a pulgada a margin iti amin nga igid ti bond paper.
4. Maysa laeng a sarita ti mapalubosan nga isalip ti kada mannurat a makisalip.
5. Nasken a bukod a putar ti autor ti maisalip, saan pay a naipablaak iti ania man a magasin wenno iti ania man a pablaakan pakairamananen ti social media, ken saan a patarus manipud iti ania man a lengguahe.
6. Ti laeng parbo a nagan (pen name) ti autor ti agparang iti manuskrito a maisalip. Mapakuyogan ketdi ti opisial nga entry iti maysa pay a dokumento a nakailanadan dagitoy: paulo ti sarita, parbo ken pudno a nagan, ken kabibiag ti autor agraman numero ti telepono a pakakontakan kenkuana.
7. Ipatulod dagiti dua a dokumento (sarita ken ti impormasion maipanggep iti autor) babaen iti electroniko a wagas (e-mail) iti secretariat iti daytoy nga e-mail address: f[email protected].
8. Nasken a maipatulod iti Secretariat dagiti dua a dokumento iti saan a naladladaw ngem alas-11:59 ti rabii ti Pebrero 15, 2026 (oras iti Filipinas).
9. Aniaman a pangngeddeng a mabukel dagiti hurado ket agtalinaed a kasta malaksid no maduktalan a nasalungasing ti Pagannurotan Bilang 5. Awananto metten ti autor iti gundaway ken pribilehio a makisalip pay kadagiti mapasungad a pasalip ti ALVIYA.
10. Makipagtagikua ti ALVIYA Literary Foundation kadagiti mangabak a sarita nupay addaan latta iti karbengan ti autor iti copyright daytoy. Maaddaan pay ti agpasalip iti karbengan a mangipablaak kadagitoy mangabak a sarita iti ania man a wagas a kayatna nga aramaten pakairamananen ti elektroniko ken tradisional a wagas ti panagipablaak.
11. Dagiti gunggona : First Prize – ₱20,000.00; Second Prize – ₱10,000.00, ken Third Prize – ₱7,000.00. ken dua a consolation prizes a sag-₱4,000.00. Addanto met maited a sertipiko ti pammadayaw kadagiti amin a mangabak.
12. Maiwaragawag dagiti mangabak a sarita iti umuna a lawas ti Abril 2026 ket mapadayawanto dagiti mangabak bayat ti Dap-ayan 2026.
Kas kuna ti esponsor, agtultuloy daytoy a pasalip iti panagsurat iti sarita tapno marubroban ti regget nga agsurat ken maasa latta ti kabaelan dagiti mannurat nga Ilokano, propesional ken agdadamo, ket maputar dagiti piesa ti literatura a mangilamina iti biag, kabibiag, kultura ken tradision ni Ilokano. (FPM)
